ఇలాంటి సినిమాకు పనిచేయడం ప్రతి సంగీత దర్శకుడి కల: ఏఆర్ రెహమాన్

ఆస్కార్ అవార్డు గ్రహీత, సంగీత మాంత్రికుడు ఏఆర్ రెహమాన్ ఒక అరుదైన చిత్రానికి సంగీతం అందించారు. సంభాషణలు లేకుండా కేవలం హావభావాలు, నేపథ్య సంగీతంతో నడిచే 'ఉఫ్ యే సియాపా' అనే మూకీ కామెడీ సినిమాకు ఆయన స్వరాలు సమకూర్చారు. ఇలాంటి సినిమాకు పనిచేయడం ప్రతి సంగీత దర్శకుడి కల అని ఆయన అభిప్రాయపడ్డారు.

ఈ సినిమాకు సంగీతం అందించిన అనుభవం గురించి ఆయన మాట్లాడుతూ, "డైలాగులు లేకుండా కేవలం స్కోర్‌తో నడిచే సినిమా చేయడం ఏ కంపోజర్‌కైనా ఒక కల లాంటిది. అందుకే ఈ అవకాశం రాగానే వెంటనే అంగీకరించాను" అని తెలిపారు. ఒకప్పుడు కమల్ హాసన్ నటించిన 'పుష్పక విమానం' తర్వాత, మళ్లీ ఆ తరహాలో వస్తున్న ఈ చిత్రంపై ప్రేక్షకుల్లో ఆసక్తి నెలకొంది.

ఈ ప్రాజెక్ట్ తన వద్దకు ఎలా వచ్చిందో వివరిస్తూ, "దర్శకుడు జి. అశోక్ కథను వివరించిన తీరు నన్ను బాగా ఆకట్టుకుంది. ఆయనకు సినిమాపై పూర్తి నమ్మకం ఉంది. నేను ముందుగా కొన్ని ఐడియాలు, రెండు పాటలు ఇచ్చాను. ఆ తర్వాత సినిమా చూసి, మరికొన్నింటిని కంపోజ్ చేశాను. కొన్ని సన్నివేశాలకు ఫ్రేమ్-టు-ఫ్రేమ్ సింక్ అయ్యేలా సంగీతం అందించగా, మరికొన్ని చోట్ల సాధారణ శైలిని అనుసరించాను" అని రెహమాన్ చెప్పారు.

'ఉఫ్ యే సియాపా' సినిమా కథ విషయానికొస్తే, ఇదొక పొరపాట్లతో నడిచే కథ. కేసరి లాల్ సింగ్ (సోహమ్ షా) అనే సామాన్య వ్యక్తి, తన భార్య పుష్ప (నుష్రత్ భరుచా) అపార్థం కారణంగా చిక్కుల్లో పడతాడు. పొరుగింటి అమ్మాయి కామినితో (నోరా ఫతేహి) సంబంధం అంటగట్టి ఆమె ఇల్లు విడిచి వెళ్లిపోతుంది. ఈ గందరగోళం సరిదిద్దుకునేలోపే, పొరపాటున వచ్చిన ఓ డ్రగ్స్ పార్శిల్, అనుకోకుండా ఇంట్లో శవాలు ప్రత్యక్షమవడం వంటి సంఘటనలతో అతని జీవితం తలకిందులవుతుంది. ఈ సమస్యల నుంచి కేసరి ఎలా బయటపడ్డాడన్నదే ఈ సినిమా కథ.

జి. అశోక్ దర్శకత్వం వహించిన ఈ చిత్రం సెప్టెంబర్ 5న థియేటర్లలో విడుదల కానుంది.