ఐదు దశాబ్దాల నా రాజకీయ జీవితంలో ఇదో మరిచిపోలేని రోజు: సీఎం చంద్రబాబు

దశాబ్దాల నిరీక్షణకు తెరదించుతూ హంద్రీ-నీవా సుజల స్రవంతి ప్రాజెక్టు ద్వారా కృష్ణా జలాలు చిత్తూరు జిల్లా కుప్పం నియోజకవర్గానికి చేరుకున్నాయి. ఈ చారిత్రాత్మక ఘట్టంపై ఆంధ్రప్రదేశ్ ముఖ్యమంత్రి చంద్రబాబు తీవ్ర భావోద్వేగానికి గురయ్యారు. తన ఐదు దశాబ్దాల రాజకీయ ప్రస్థానంలో ఇది ఒక మరిచిపోలేని రోజని ఆయన అభివర్ణించారు. ఈ మేరకు ఆయన సోషల్ మీడియా వేదికగా తన సంతోషాన్ని పంచుకున్నారు.

శనివారం పరమ సముద్రం సమీపంలో కృష్ణా జలాలకు ముఖ్యమంత్రి చంద్రబాబు ప్రత్యేక పూజలు చేసి జలహారతి ఇచ్చారు. అనంతరం ఆయన మాట్లాడుతూ, "నన్ను ఈ స్థాయికి తీసుకొచ్చిన నా సొంత గడ్డ కుప్పంలో కృష్ణా జలాలు పారించడం నా జీవితంలో అత్యంత సంతోషకరమైన విషయం. 1999లో నా చేతుల మీదుగా శంకుస్థాపన చేసిన హంద్రీ-నీవా ప్రాజెక్టును పూర్తిచేసి, ఈరోజు కుప్పానికి కృష్ణమ్మను తీసుకురావడం వెనుక ఎన్నో ఏళ్ల కృషి, పట్టుదల ఉన్నాయి" అని పేర్కొన్నారు.

ప్రాజెక్టు పూర్తి చేసే క్రమంలో ఎన్నో అవాంతరాలు, సవాళ్లను ఎదుర్కొన్నట్లు చంద్రబాబు గుర్తుచేసుకున్నారు. అయినప్పటికీ, పట్టుదలతో సంకల్పాన్ని నెరవేర్చామని తెలిపారు. "గత నెలలో మల్యాల నుంచి నీటిని విడుదల చేసి రాయలసీమ జిల్లాలకు నీరందించాం. ఇప్పుడు 738 కిలోమీటర్లు ప్రయాణించి చిత్తూరు జిల్లాలోని చిట్టచివరి ఆయకట్టు అయిన కుప్పానికి కృష్ణమ్మ చేరడంతో రైతుల కళ్లల్లో ఆనందం చూసి నాకు ఎంతో సంతృప్తి కలిగింది" అని ఆయన వివరించారు.

ఈ సందర్భంగా రాష్ట్ర ప్రజలకు ఆయన భరోసా ఇచ్చారు. శ్రీకాకుళం నుంచి చిత్తూరు వరకు రాష్ట్రంలోని ప్రతి సాగునీటి ప్రాజెక్టును పూర్తి చేస్తామని హామీ ఇచ్చారు. ప్రతి ఎకరాకు నీరు అందించి, రాష్ట్రాన్ని సస్యశ్యామలం చేయడమే తన ప్రభుత్వ లక్ష్యమని చంద్రబాబు స్పష్టం చేశారు.