నా ముందుకొస్తే బాదడమే.. బౌలర్ ఎవరైనా ఒకటే: రోహిత్ శర్మ

టీమిండియా కెప్టెన్, స్టార్ ఓపెనర్ రోహిత్ శర్మ తనదైన శైలిలో ఆసక్తికర వ్యాఖ్యలు చేశాడు. అంతర్జాతీయ క్రికెట్‌లో సిక్సర్ల రారాజుగా పేరుగాంచిన రోహిత్‌ను, మీకు ఏ బౌలర్‌పై సిక్సర్లు కొట్టడం అంటే బాగా ఇష్టం? అని ప్రశ్నించగా, ఆయన చమత్కారంగా బదులిచ్చాడు. తనకు ప్రత్యేకంగా ఫేవరెట్ బౌలర్ అంటూ ఎవరూ లేరని, బరిలోకి దిగితే ప్రత్యర్థి ఎవరైనా తన లక్ష్యం ఒక్కటేనని స్పష్టం చేశాడు.

ఓరల్-బీ అనే బ్రాండ్ నిర్వహించిన ఒక కార్యక్రమంలో పాల్గొన్న రోహిత్ శర్మ, అభిమానులతో ముచ్చటించాడు. ఈ సందర్భంగా ఆయన మాట్లాడుతూ, "నాకు ఫలానా బౌలర్‌ను టార్గెట్ చేయాలనే ఆలోచన ఉండదు. క్రీజులోకి అడుగుపెట్టినప్పుడు నా ముందు ఎవరు బౌలింగ్ చేస్తున్నా, వారిని బాదాలనే ఆలోచనతోనే ఉంటాను. నా మైండ్‌సెట్ అంతే" అని అన్నాడు.

"నా ముందుకొచ్చిన ప్రతి బౌలర్‌పై ఒత్తిడి పెంచి, మెరుగైన ప్రదర్శన చేయడమే నా లక్ష్యం. ప్రత్యర్థిని ఒత్తిడిలోకి నెట్టడానికి నాకు కొన్ని సొంత పద్ధతులు ఉన్నాయి. వాటినే నేను అనుసరిస్తాను" అని హిట్‌మ్యాన్‌ వివరించాడు. ఈ సమాధానంతో అక్కడున్న అభిమానులంతా కేరింతలతో హోరెత్తించారు. అంతర్జాతీయ క్రికెట్‌లో రోహిత్ 637 సిక్సర్లతో అగ్రస్థానంలో ఉన్న విషయం తెలిసిందే.

ప్రస్తుతం 38 ఏళ్ల రోహిత్ శర్మ.. ఐపీఎల్ 2025 తర్వాత క్రికెట్‌కు దూరంగా ఉంటున్నాడు. ఆ టోర్నమెంట్‌లో ముంబై ఇండియన్స్ తరఫున 15 మ్యాచ్‌లలో 418 పరుగులు చేసి, 22 సిక్సర్లు బాదాడు. అయితే, ఐపీఎల్ సమయంలోనే టెస్ట్ క్రికెట్‌కు రిటైర్మెంట్ ప్రకటించిన రోహిత్, ప్రస్తుతం కేవలం వన్డే ఫార్మాట్‌లో మాత్రమే భారత్‌కు ప్రాతినిధ్యం వహిస్తున్నాడు.

అక్టోబర్‌లో ఆస్ట్రేలియా పర్యటనలో జరిగే మూడు వన్డేల సిరీస్‌తో రోహిత్ తిరిగి అంతర్జాతీయ క్రికెట్‌లోకి అడుగుపెట్టనున్నాడు. అయితే, ఈ సిరీస్‌కు ముందు అతను ఇండియా-ఏ తరఫున కొన్ని ప్రాక్టీస్ మ్యాచ్‌లు ఆడే అవకాశం ఉంది. మరోవైపు, 2027 ప్రపంచకప్ సమీపిస్తున్న తరుణంలో వన్డే జట్టులో రోహిత్ స్థానంపై భిన్నాభిప్రాయాలు వ్యక్తమవుతున్నాయి.