లండన్‌లో భార్యతో కోహ్లీ.. సామాన్యుడిలా వీధుల్లో చక్కర్లు.. వైరల్ అవుతున్న వీడియో!

టీమిండియా స్టార్ బ్యాటర్ విరాట్ కోహ్లీ, తన భార్య‌ అనుష్క శర్మతో కలిసి లండన్ వీధుల్లో సందడి చేశాడు. ప్రస్తుతం క్రికెట్‌కు విరామం తీసుకున్న ఆయన, కుటుంబంతో కలిసి హాయిగా గడుపుతున్నారు. ఇండియాలో ఉండే అభిమానుల కోలాహలానికి దూరంగా, ఒక సాధారణ పౌరుడిలా ఆయన లండన్‌లో తిరుగుతున్న దృశ్యాలు సోషల్ మీడియాలో వైరల్ అవుతున్నాయి.

ప్రస్తుతం నెట్టింట‌ చక్కర్లు కొడుతున్న ఈ వీడియోలో కోహ్లీ, అనుష్క స్థానికులతో ముచ్చటిస్తున్నట్లు కనిపిస్తోంది. తమను గుర్తుపట్టిన వారితో ఈ సెలబ్రిటీ జంట నవ్వుతూ పలకరించడం, సరదాగా మాట్లాడటం వంటివి ఈ వీడియోలో ఉన్నాయి. ఎలాంటి హడావుడి లేకుండా వారు తమ వ్యక్తిగత సమయాన్ని ఆస్వాదిస్తున్నారు.

ఇటీవలే ముగిసిన ఐపీఎల్ 2025 సీజన్‌లో రాయల్ ఛాలెంజర్స్ బెంగళూరు (ఆర్‌సీబీ)కు టైటిల్ అందించిన తర్వాత కోహ్లీ ఈ విరామం తీసుకున్నాడు. కాగా, ఈ ఏడాది మే నెలలో ఆయన టెస్ట్ క్రికెట్‌కు వీడ్కోలు పలికిన విషయం తెలిసిందే. అంతకుముందు, 2024 టీ20 ప్రపంచకప్ ఫైనల్‌లో భారత్‌ను గెలిపించి, ఆ ఫార్మాట్ నుంచి కూడా తప్పుకున్నాడు. టెస్టుల్లో 123 మ్యాచ్‌లకు ప్రాతినిధ్యం వహించి 9,230 పరుగులు చేసిన కోహ్లీ, 68 మ్యాచ్‌లకు కెప్టెన్‌గా వ్యవహరించి 40 విజయాలతో భారత్ తరఫున అత్యంత విజయవంతమైన కెప్టెన్‌గా నిలిచాడు.

టెస్టులు, టీ20ల నుంచి రిటైర్ అయిన నేపథ్యంలో విరాట్ ఇకపై కేవలం వన్డే ఫార్మాట్‌లో మాత్రమే ఆడనున్నాడు. అక్టోబర్‌లో ఆస్ట్రేలియాతో జరగనున్న వన్డే సిరీస్‌లో రన్ మెషిన్‌ తిరిగి మైదానంలోకి అడుగుపెట్టనున్నాడు. భారత్ తరఫున చివరిసారిగా ఐసీసీ ఛాంపియన్స్ ట్రోఫీ 2025లో ఆడిన కోహ్లీ, ఆ టోర్నీలో జట్టు విజయంలో కీలక పాత్ర పోషించాడు.