షాహీన్ అఫ్రిది ప్రపంచ రికార్డు.. రషీద్ ఖాన్‌ను వెనక్కి నెట్టిన పాక్ పేసర్

పాకిస్థాన్ స్టార్ పేసర్ షాహీన్ షా అఫ్రిది వన్డే క్రికెట్‌లో సరికొత్త ప్రపంచ రికార్డును తన ఖాతాలో వేసుకున్నాడు. 65 వన్డే మ్యాచ్‌ల తర్వాత అత్యధిక వికెట్లు పడగొట్టిన బౌలర్‌గా చరిత్ర సృష్టించాడు. శుక్రవారం వెస్టిండీస్‌తో జరిగిన తొలి వన్డేలో నాలుగు వికెట్లు తీయడం ద్వారా అతను ఈ చారిత్రక ఘనతను అందుకున్నాడు. ఈ ప్రదర్శనతో పాకిస్థాన్ జట్టు 5 వికెట్ల తేడాతో విజయం సాధించింది.

ఈ మ్యాచ్‌కు ముందు 64 వన్డేల్లో 127 వికెట్లతో ఉన్న షాహీన్, విండీస్‌పై 4 వికెట్లు పడగొట్టి తన మొత్తం వికెట్ల సంఖ్యను 131కి చేర్చుకున్నాడు. దీంతో 65 వన్డేల తర్వాత అత్యధిక వికెట్లు (128) తీసిన ఆఫ్ఘనిస్థాన్ స్పిన్నర్ రషీద్ ఖాన్ రికార్డును అతను అధిగమించాడు.

ఇక మ్యాచ్ విషయానికొస్తే, టాస్ గెలిచి ఫీల్డింగ్ ఎంచుకున్న పాకిస్థాన్.. వెస్టిండీస్‌ను 280 పరుగులకు కట్టడి చేసింది. విండీస్ బ్యాటర్లలో ఎవిన్ లూయిస్ (60), కెప్టెన్ షాయ్ హోప్ (55), రోస్టన్ చేజ్ (53) అర్ధ సెంచరీలతో రాణించారు. పాక్ బౌలర్లలో షాహీన్ 51 పరుగులిచ్చి 4 వికెట్లతో చెలరేగగా, నసీమ్ షా 3 వికెట్లు పడగొట్టాడు.

అనంతరం 281 పరుగుల లక్ష్యంతో బరిలోకి దిగిన పాకిస్థాన్ 48.5 ఓవర్లలో 5 వికెట్లు కోల్పోయి విజయాన్ని అందుకుంది. అరంగేట్ర ఆటగాడు హసన్ నవాజ్ 54 బంతుల్లో 63 పరుగులు చేసి అజేయంగా నిలిచి జట్టును గెలిపించాడు. కెప్టెన్ మహమ్మద్ రిజ్వాన్ (53) కూడా కీలక ఇన్నింగ్స్ ఆడాడు. "ప్రారంభంలో స్పిన్నర్లను ఎదుర్కోవడం కష్టంగా ఉన్నా, మంచు ప్రభావంతో బ్యాటింగ్ సులువైంది" అని ప్లేయర్ ఆఫ్ ద మ్యాచ్‌గా ఎంపికైన నవాజ్ తెలిపాడు.

"టాస్ కీలక పాత్ర పోషించింది, మేము మరికొన్ని పరుగులు చేసి ఉంటే బాగుండేది" అని విండీస్ కెప్టెన్ షాయ్ హోప్ అన్నాడు. మూడు వన్డేల సిరీస్‌లో పాకిస్థాన్ 1-0 ఆధిక్యంలో నిలవగా, రెండో వన్డే రేపు (ఆదివారం) ఇదే వేదికపై జరగనుంది.