వడోదరలో రద్దీ రోడ్డుపైకి ఎనిమిది అడుగుల భారీ మొసలి.. ఇదిగో వైర‌ల్‌ వీడియో!

రద్దీ రోడ్డుపైకి ఉన్నట్టుండి ఏకంగా ఎనిమిది అడుగుల భారీ మొసలి ప్ర‌త్య‌క్ష‌మైంది. దాంతో ఆ మొసలిని చూసేందుకు జనం ఎగ‌బ‌డ్డారు. దాంతో రోడ్డుపై ట్రాఫిక్ జామ్ ఏర్ప‌డింది. గుజరాత్‌లోని వడోదరలో ఈ ఘటన చోటుచేసుకుంది. ఇందుకు సంబంధించిన వీడియో ప్ర‌స్తుతం సోష‌ల్ మీడియాలో వైర‌ల్ అవుతోంది. 

వడోదరలో నర్హరి విశ్వామిత్రి నది సమీపంలోని నర్హహరి విశ్వామిత్రి బ్రిడ్జి రోడ్డులో శుక్రవారం రాత్రి ఓ భారీ మొసలి ద‌ర్శ‌న‌మిచ్చింది. ఎనిమిది అడుగుల మొసలి రోడ్డుపై కనిపించడంతో అటుగా ప్రయాణించేవాళ్లు నిర్ఘాంత‌పోయారు. భారీ ఆ మొసలిని తమ ఫోన్ల‌లో బంధించేందుకు పోటీపడ్డారు. దాంతో రోడ్డుపై భారీగా ట్రాఫిక్‌ జామ్ ఏర్ప‌డింది. 

కమిషనర్‌ బంగ్లాకు సమీపంలోనే ఈ ఘటన చోటుచేసుకుంది. జనం తన చుట్టూ గుమిగూడటంతో భయపడిన మొసలి ముందుగా కదలకుండా ఉండిపోయింది. ఆ తర్వాత తప్పించుకునేందుకు ఒక్కసారిగా జనంవైపు దూసుకెళ్లింది. స్థానికులు అటవీశాఖ అధికారులకు సమాచారం ఇవ్వడంతో వారు ఘటనాస్థలికి వచ్చి, మొసలిని ప‌ట్టుకెళ్లారు. 

ఆ త‌ర్వాత దాన్ని విశ్వామిత్రి నదిలో వదిలేశారు. కాగా, ఆ నదిలోని 17 కిలోమీటర్ల పరిధిలో మొత్తం 300కు పైగా మొసళ్లు ఉన్నాయని అధికారులు చెప్పారు. భారీ వర్షాల వల్ల నదులు ఉప్పొంగడంతో మొసళ్లు దారితప్పి జనావాసాల్లోకి వస్తున్నాయని పేర్కొన్నారు.