కన్న కూతురిని చంపిన తల్లికి జీవిత ఖైదు

తమ అక్రమ సంబంధానికి అడ్డు వస్తుందని భావించి కన్న కూతురినే అతి కిరాతకంగా హత్య చేసిన కేసులో తల్లికి, ఆమె మామకు న్యాయస్థానం జీవిత ఖైదు విధించింది. రెండున్నర ఏళ్ల క్రితం ఖమ్మం జిల్లాలో సంచలనం సృష్టించిన ఈ కేసులో నిందితులు నేరం చేసినట్టు రుజువు కావడంతో సత్తుపల్లి ఆరో అదనపు జిల్లా న్యాయమూర్తి ఎం. శ్రీనివాస్ సోమవారం ఈ తీర్పు వెలువరించారు.

ప్రాసిక్యూషన్ కథనం ప్రకారం... ఖమ్మం జిల్లా బోనకల్లు మండలానికి చెందిన పాలెపు నరసింహారావు (65), అతని కోడలు సునీత (32) మధ్య కొంతకాలంగా అక్రమ సంబంధం కొనసాగుతోంది. సునీత భర్త హరికృష్ణ ఇంట్లో లేని సమయంలో, 2022 ఫిబ్రవరి 8న వీరిద్దరూ ఏకాంతంగా ఉండగా 12 ఏళ్ల కుమార్తె చూసింది. ఈ విషయం బయటకు తెలిస్తే పరువు పోతుందని భయపడిన సునీత, తన మామ నరసింహారావుతో కలిసి దారుణానికి ఒడిగట్టింది. బాలిక కాళ్లు, చేతులు కట్టేసి, వైరుతో గొంతు నులిమి చంపేశారు.

హత్యను దాచిపెట్టేందుకు నిందితులు అనేక ప్రయత్నాలు చేశారు. బాలికకు ఫిట్స్ వచ్చి కిందపడి చనిపోయిందని అందరినీ నమ్మించే ప్రయత్నం చేశారు. స్థానిక పీహెచ్‌సీ నుంచి ఖమ్మం ప్రభుత్వ ఆసుపత్రికి తరలించగా, బాలిక అప్పటికే మరణించిందని వైద్యులు నిర్ధారించారు. అయితే, బాలిక మెడపై ఉన్న గాయాలను గమనించిన వైద్యులు పోలీసులకు సమాచారం ఇచ్చారు. దీంతో అప్పటి ఎస్సై కవిత అనుమానాస్పద మృతిగా కేసు నమోదు చేశారు.

విచారణ సమయంలో కేసును తప్పుదోవ పట్టించేందుకు సునీత, తన మామ ప్రోద్బలంతో గ్రామంలోని మరో యువకుడిపై నేరం మోపింది. అయితే, పోలీసుల లోతైన దర్యాప్తులో అసలు నిజం బయటపడింది. సాక్ష్యాధారాలు, వైద్య నివేదికలను పరిశీలించిన న్యాయస్థానం.. తల్లి సునీత, తాత నరసింహారావులే దోషులుగా నిర్ధారించి యావజ్జీవ కారాగార శిక్ష విధిస్తూ తీర్పు ఇచ్చింది. ఈ కేసులో ప్రభుత్వం తరఫున అదనపు పబ్లిక్ ప్రాసిక్యూటర్ మహ్మద్ అబ్దుల్ పాషా వాదనలు వినిపించారు. దర్యాప్తు బృందాన్ని పోలీస్ కమిషనర్ సునీల్ దత్ అభినందించారు.