తొక్కిసలాట విషయం కోహ్లీకి తెలియకపోవచ్చు.. ఆర్సీబీకి మాత్రం తెలిసి ఉండొచ్చు: మాజీ క్రికెటర్

ఐపీఎల్ తొలి ట్రోఫీ గెలిచిన ఆనందంలో రాయల్ ఛాలెంజర్స్ బెంగళూరు (ఆర్‌సీబీ) జట్టు నిన్న బుధవారం ఎం. చిన్నస్వామి స్టేడియంలో ఏర్పాటు చేసిన విజయోత్సవ వేడుకల సందర్భంగా తీవ్ర విషాదం చోటుచేసుకుంది. స్టేడియం వెలుపల జరిగిన తొక్కిసలాటలో కనీసం 11 మంది అభిమానులు మరణించగా, పదుల సంఖ్యలో గాయపడ్డారు. ఈ విషాదకర ఘటనపై భారత మాజీ క్రికెటర్ అతుల్ వాసన్ స్పందించారు. స్టేడియం వెలుపల అభిమానులు ప్రాణాలు కోల్పోతుంటే, లోపల వేడుకలు జరుపుకోవడంపై ఆయన విచారం వ్యక్తం చేశారు.

ఈ ఘటనపై ఏఎన్ఐ వార్తా సంస్థతో వాసన్ మాట్లాడుతూ, "బయట ప్రజలు చనిపోతున్నారని తెలిసి కూడా విరాట్ కోహ్లీ లోపల సన్మాన కార్యక్రమాన్ని కొనసాగించాడంటే నేను నమ్మలేను. రాజకీయ నాయకుల గురించి నేను నమ్మగలను, ఎందుకంటే వారు నిర్దాక్షిణ్యంగా, మొండిగా ఉంటారు. ఆర్‌సీబీ ఫ్రాంచైజీ అనే కార్పొరేట్ సంస్థ కూడా అంతే. ఫ్రాంచైజీలు బ్యాలెన్స్ షీట్లు, ఆదాయం చూపించుకోవాలి కాబట్టి వారు పట్టించుకోరు. బహుశా వారికి తెలిసి ఉండవచ్చు. కానీ కోహ్లీకి తెలిసి ఉండకపోవచ్చు" అని వ్యాఖ్యానించారు.

"విరాట్ కోహ్లీకి, ఆటగాళ్లకు ఈ విషయం తెలిసేసరికి, వారు ఏమీ చేయలేని పరిస్థితిలో ఉండి ఉంటారు. ఒకవేళ విరాట్‌కు తెలిసి ఉంటే, అతను వెంటనే బయటకు వచ్చేసేవాడు. విరాట్‌కు తెలిసి ఇలా జరిగిందంటే నేను నమ్మలేను. కానీ ఇది చాలా విచారకరం, చాలా విషాదకరం" అని వాసన్ ఆవేదన వ్యక్తం చేశారు.