మరో పాక్ అధికారిపై భారత్ వేటు.. 24 గంటల్లో దేశం విడిచి వెళ్లాలని ఆదేశం

భారత్, పాకిస్థాన్ మధ్య దౌత్యపరమైన ఉద్రిక్తతలు మరోసారి తీవ్రస్థాయికి చేరాయి. పాకిస్థాన్‌కు చెందిన ఒక దౌత్య అధికారిని భారత ప్రభుత్వం బుధవారం 'అవాంఛనీయ వ్యక్తి' (పర్సొనా నాన్ గ్రాటా)గా ప్రకటించింది. తన అధికారిక హోదాకు తగని కార్యకలాపాలకు పాల్పడుతున్నారన్న ఆరోపణలపై ఈ నిర్ణయం తీసుకున్నట్లు కేంద్ర ప్రభుత్వం స్పష్టం చేసింది. సదరు అధికారి 24 గంటల్లోగా భారతదేశం విడిచి వెళ్లిపోవాలని ఆదేశాలు జారీ చేసింది.

విదేశీ వ్యవహారాల మంత్రిత్వ శాఖ ఈ మేరకు పాకిస్థాన్ హైకమిషన్ చార్జ్ డి అఫైర్స్‌కు అధికారికంగా తెలియజేసింది. భారత గడ్డపై ఉన్న పాకిస్థానీ దౌత్యవేత్తలు లేదా అధికారులు ఎవరూ తమ హోదాను, ప్రత్యేక అధికారాలను దుర్వినియోగం చేయకుండా కఠిన చర్యలు తీసుకోవాలని స్పష్టం చేసింది. దౌత్య పరిభాషలో 'పర్సొనా నాన్ గ్రాటా' అంటే, ఒక విదేశీ అధికారి లేదా దౌత్యవేత్తను ఆతిథ్య దేశంలో ఇకపై ఉండటానికి అనుమతించకపోవడం. సాధారణంగా కారణం చెప్పకుండానే వారిని దేశం విడిచి వెళ్లాలని ప్రభుత్వం ఆదేశిస్తుంది. ఒక విదేశీ ప్రతినిధి పట్ల తీవ్ర అసంతృప్తిని వ్యక్తం చేయడానికి ఇది అత్యంత కఠినమైన చర్య.

ఈ నెలలోనే పాకిస్థాన్ దౌత్యవేత్తను భారత్ బహిష్కరించడం ఇది రెండోసారి కావడం గమనార్హం. మే 13న కూడా ఢిల్లీలోని పాకిస్థాన్ హైకమిషన్‌లో పనిచేస్తున్న ఓ అధికారిని 'పర్సొనా నాన్ గ్రాటా'గా ప్రకటించి, దేశం విడిచి వెళ్లాలని ఆదేశించిన విషయం తెలిసిందే. ఏప్రిల్ 22న పహల్గామ్‌లో జరిగిన ఉగ్రదాడికి ప్రతిస్పందనగా భారత్ చేపట్టిన 'ఆపరేషన్ సిందూర్' విజయవంతమైన తీరును సుమారు 70 దేశాల రక్షణ ప్రతినిధులకు భారత సైనిక ఉన్నతాధికారి వివరించిన కొద్ది రోజులకే ఆ బహిష్కరణ జరిగింది.