భారత్-పాక్ కాల్పుల విరమణ... ప్రపంచ నేతలు ఏమన్నారంటే...!

గత నాలుగు రోజులుగా కొనసాగుతున్న దాడులు, ప్రతిదాడులకు తెరదించుతూ భారత్, పాకిస్థాన్ దేశాలు కీలక నిర్ణయం తీసుకున్నాయి. ఇరు దేశాల మధ్య కాల్పుల విరమణకు ఒప్పందం కుదిరినట్లు అధికారికంగా వెల్లడైంది. అణ్వస్త్ర దేశాలైన ఈ పొరుగు దేశాల మధ్య తాజా పరిణామంపై ప్రపంచవ్యాప్తంగా పలువురు నేతలు హర్షం వ్యక్తం చేశారు, శాంతియుత చర్చలకు ఇది మార్గం సుగమం చేస్తుందని ఆశాభావం వెలిబుచ్చారు.

ఈ ఒప్పందం వెనుక అమెరికా కీలక పాత్ర పోషించినట్లు తెలుస్తోంది. అమెరికా అధ్యక్షుడు డొనాల్డ్ ట్రంప్ ఈ విషయంపై స్పందిస్తూ, "అమెరికా మధ్యవర్తిత్వంతో రాత్రంతా జరిగిన సుదీర్ఘ చర్చల అనంతరం, భారత్ మరియు పాకిస్థాన్ తక్షణమే పూర్తిస్థాయి కాల్పుల విరమణకు అంగీకరించాయని ప్రకటించడానికి సంతోషిస్తున్నాను. ఇరు దేశాలు ఇంగితజ్ఞానం, గొప్ప వివేకం ప్రదర్శించినందుకు అభినందనలు. ఈ విషయంపై దృష్టి సారించినందుకు ధన్యవాదాలు!" అని పేర్కొన్నారు.

అమెరికా విదేశాంగ కార్యదర్శి మార్కో రూబియో కూడా ఈ పరిణామంపై హర్షం వ్యక్తం చేశారు. "భారత్, పాకిస్థాన్ ప్రభుత్వాలు తక్షణ కాల్పుల విరమణకు, తటస్థ వేదికపై విస్తృత అంశాలపై చర్చలు ప్రారంభించడానికి అంగీకరించినట్లు ప్రకటించడం ఆనందంగా ఉంది," అని ఆయన తెలిపారు.

బంగ్లాదేశ్ తాత్కాలిక ప్రధాని ముహమ్మద్ యూనస్ ఇరు దేశాల ప్రధానులను అభినందించారు. "భారత ప్రధాని నరేంద్ర మోదీ, పాకిస్థాన్ ప్రధాని షెహబాజ్ షరీఫ్ తక్షణ కాల్పుల విరమణకు అంగీకరించి, చర్చలకు సిద్ధపడటాన్ని నేను మనస్ఫూర్తిగా ప్రశంసిస్తున్నాను. దౌత్య మార్గాల ద్వారా విభేదాలను పరిష్కరించుకోవడంలో మా రెండు పొరుగు దేశాలకు బంగ్లాదేశ్ మద్దతు కొనసాగుతుంది" అని అన్నారు.

యూరోపియన్ యూనియన్ విదేశాంగ విధాన చీఫ్ కాజా కల్లాస్ మాట్లాడుతూ, "భారత్, పాకిస్థాన్ మధ్య ప్రకటించిన కాల్పుల విరమణ ఉద్రిక్తతల సడలింపునకు ఒక ముఖ్యమైన ముందడుగు. దీనిని గౌరవించేలా అన్ని ప్రయత్నాలు చేయాలి. ఈ ప్రాంతంలో శాంతి, స్థిరత్వం మరియు ఉగ్రవాద వ్యతిరేక పోరాటానికి ఈయూ కట్టుబడి ఉంది" అని వివరించారు.

బ్రిటిష్ విదేశాంగ మంత్రి డేవిడ్ లామీ ఈ ఒప్పందాన్ని స్వాగతించారు. "భారత్, పాకిస్థాన్ మధ్య నేటి కాల్పుల విరమణ ఎంతో స్వాగతించదగినది. దీనిని కొనసాగించాలని ఇరు పక్షాలను కోరుతున్నాను. ఉద్రిక్తతల తగ్గుదల అందరికీ ప్రయోజనకరం" అని ఆయన అభిప్రాయపడ్డారు.

ఇస్లామిక్ ఆధ్యాత్మిక నేత ప్రిన్స్ రహీమ్ అల్-హుసైనీ కూడా ఈ ఒప్పందంపై సంతోషం వ్యక్తం చేశారు. "కాల్పుల విరమణకు అంగీకారం కుదరడం సంతోషంగా ఉంది. 1947 నుంచి ఉన్న సమస్యలను ఇరు దేశాలు చర్చలు, శాంతియుత మార్గాల ద్వారా పరిష్కరించుకోవాలని ప్రార్థిస్తున్నాను" అని ఆయన తెలిపారు.