భారత సైన్యానికి మద్దతుగా ధర్మశాలలో బీసీసీఐ ప్రత్యేక కార్యక్రమం

భారత సైన్యం ఇటీవల చేపట్టిన 'ఆపరేషన్ సిందూర్‌'లో ప్రదర్శించిన అసామాన్య ధైర్యసాహసాల, ఉగ్రవాద నిర్మూలనలో సాధించిన విజయానికి ప్రశంసగా, బీసీసీఐ ప్రత్యేక కార్యక్రమాల ద్వారా తన సంఘీభావాన్ని ప్రకటించింది. పహల్గామ్ ఉగ్రదాడికి ప్రతిగా భారత సైనిక దళాలు 'ఆపరేషన్ సిందూర్‌' పేరిట పాకిస్థాన్‌, పాక్ ఆక్రమిత కశ్మీర్‌లోని ఉగ్రవాద శిబిరాలను విజయవంతంగా ధ్వంసం చేసిన నేపథ్యంలో ఈ నిర్ణయం తీసుకుంది.

ఈ క్రమంలో, భారత సైనికుల నిరుపమాన సేవలను స్మరించుకుంటూ, వారి త్యాగనిరతిని గౌరవిస్తూ, నేడు ధర్మశాల క్రికెట్ స్టేడియం ఓ ప్రత్యేక కార్యక్రమానికి వేదిక కానుంది. పంజాబ్ కింగ్స్, ఢిల్లీ క్యాపిటల్స్ జట్ల మధ్య జరగనున్న ఐపీఎల్ మ్యాచ్ ఆరంభానికి ముందు, బీసీసీఐ ఆధ్వర్యంలో సాంస్కృతిక కార్యక్రమాలు నిర్వహించనున్నారు.

ఈ కార్యక్రమంలో ప్రముఖ గాయకుడు బి ప్రాక్ (ప్రతీక్ బచన్) పాల్గొని, భారత సైనికుల గౌరవార్థం దేశభక్తి గీతాలను ఆలపించి, వారి సేవలను కొనియాడనున్నారు. భారత సైన్యానికి మద్దతుగా బీసీసీఐ ఇలాంటి కార్యక్రమాలు చేపట్టడం ఇదే మొదటిసారి కాదు. మే 7న కోల్‌కతాలోని ఈడెన్‌గార్డెన్స్‌లో కోల్‌కతా నైట్‌రైడర్స్, చెన్నై సూపర్ కింగ్స్ జట్ల మధ్య జరిగిన మ్యాచ్‌కు ముందు కూడా ఇరు జట్ల క్రీడాకారులు, సహాయక సిబ్బంది భారత సైన్యానికి సంఘీభావం తెలుపుతూ జాతీయ గీతాలాపనలో పాల్గొన్నారు.