అమెజాన్ ప్రైమ్ లో ఇనయా సుల్తానా క్రైమ్ థ్రిల్లర్!

ఇనయా సుల్తానా .. యూత్ లో ఈ పేరుకు మంచి క్రేజ్ ఉంది. బిగ్ బాస్ సీజన్ 6 తో ఈ బ్యూటీ యూత్ కి బాగా కనెక్ట్ అయింది. అప్పటి నుంచి కూడా సినిమాలలో చిన్నచిన్న పాత్రలను వేస్తూ వెళుతోంది. అలా ఆమె చేసిన సినిమానే 'నటరత్నాలు'. క్రితం ఏడాది మే నెలలో థియేటర్లకు ఈ సినిమా వచ్చింది. క్రైమ్ కామెడీ థ్రిల్లర్ జోనర్లో నిర్మితమైన ఈ సినిమా ఇప్పుడు ఓటీటీ తెరపైకి వచ్చేసింది. 

శివనాగు దర్శకత్వం వహించిన ఈ సినిమాలో, ఇనయా సుల్తానాతో పాటు సుదర్శన్ .. తాగుబోతు రమేష్ .. రంగస్థలం మహేశ్ ముఖ్యమైన పాత్రలను పోషించారు. మర్డర్ మిస్టరీకి కామెడీ టచ్ ఇస్తూ నడిచే కథ ఇది. అలాంటి ఈ సినిమా నిన్నటి నుంచి అమెజాన్ ప్రైమ్ లో స్ట్రీమింగ్ అవుతోంది. 99 రూపాయల రెంటల్ విధానంలో అందుబాటులోకి వచ్చింది. 

బంగార్రాజుకి సినిమా హీరో కావాలని ఉంటుంది. ఆ దిశగా అతను అడుగు వేయడానికి స్నేహితుల సపోర్టు ఉంటుంది. సువర్ణ కూడా సినిమాలలో హీరోయిన్ కావాలని వస్తుంది. అలా మొదలైన వారి పరిచయం ప్రేమగా మారుతుంది. జీవితాన్ని గురించి కలలు కంటున్న ఈ బృందం, ఒక మర్డర్ కేసులో చిక్కుకుంటుంది. అందుకు కారకులు ఎవరు? అందులో నుంచి వాళ్లు ఎలా బయటపడ్డారు? అనేది కథ.