ఏఐ యుగంలో రాణించాలంటే: విద్యార్థులకు ఆల్ట్‌మన్ సూచనలు

టెక్నాలజీ భవిష్యత్తును దృష్టిలో ఉంచుకుని విద్యార్థులు ఏఐ టూల్స్‌పై పట్టు సాధించాలని ఓపెన్ఏఐ సీఈఓ శామ్ ఆల్ట్‌మన్ సూచించారు. పలు సంస్థల్లో 50 శాతానికి పైగా కోడింగ్ పనులను ఏఐ చేస్తోందని ఆయన తెలిపారు. రాబోయే రోజుల్లో ఏఐ వినియోగం మరింత పెరిగే అవకాశం ఉందని, కాబట్టి విద్యార్థులు ఏఐ నైపుణ్యాలపై దృష్టి సారించాలని ఆయన అభిప్రాయపడ్డారు.

తాను హైస్కూల్‌లో ఉన్నప్పుడు కోడింగ్ నేర్చుకోవడం ఎంత ముఖ్యమో, ఇప్పుడు ఏఐ టూల్స్‌ను ఉపయోగించడం కూడా అంతే ముఖ్యమని ఆల్ట్‌మన్ అన్నారు. ఏఐ రంగంలో నైపుణ్యం సంపాదించడం వల్ల భవిష్యత్తులో మంచి ఉద్యోగాలు పొందే అవకాశం ఉంటుందని ఆయన పేర్కొన్నారు.

ఇప్పటికే పలు కంపెనీలు కోడింగ్ కోసం ఏఐని ఉపయోగిస్తున్నాయి. ఆంత్రోపిక్ సీఈఓ డారియో అమోడీ మాట్లాడుతూ.. రాబోయే ఆరు నెలల్లో ఏఐ 90 శాతం కోడ్‌ను ఉత్పత్తి చేయగలదని అంచనా వేశారు. ఓపెన్ఏఐ చీఫ్ ప్రొడక్ట్ ఆఫీసర్ కెవిన్ వీల్ కూడా ఈ సంవత్సరం చివరి నాటికి ఏఐ కోడింగ్‌లో మానవులను అధిగమిస్తుందని తెలిపారు.

ఏఐ మరింత అభివృద్ధి చెందితే సాఫ్ట్‌వేర్ ఇంజనీర్లకు డిమాండ్ తగ్గుతుందని ఆల్ట్‌మన్ అభిప్రాయపడ్డారు. ప్రస్తుతం ఇంజనీర్లకు డిమాండ్ ఉన్నప్పటికీ, ఏఐ ఎక్కువ పనులు చేయగలిగితే ఇంజనీర్ల అవసరం తగ్గుతుందని ఆయన చెప్పారు. ఏఐ కారణంగా ఉద్యోగాల తొలగింపు వెంటనే జరగదని, ఇది నెమ్మదిగా ప్రారంభమై క్రమంగా అన్ని రంగాలకు విస్తరిస్తుందని ఆయన వివరించారు. కాబట్టి విద్యార్థులు కొత్త టెక్నాలజీలను నేర్చుకోవడానికి సిద్ధంగా ఉండాలని ఆయన సూచించారు.