విజయవాడలో ప్రపంచ తెలుగు రచయితల మహాసభలు... తెలుగువారందరికీ గర్వకారణం: సీఎం చంద్ర‌బాబు

విజయవాడలో జ‌రుగుతున్న‌ ప్రపంచ తెలుగు రచయితల మహాసభలపై సీఎం చంద్ర‌బాబు నాయుడు ఎక్స్ (ట్విట్ట‌ర్) వేదిక‌గా స్పందించారు. విజయవాడలో ప్రపంచ తెలుగు రచయితల మహాసభలు నిర్వహించుకోవడం తెలుగువారందరికీ గర్వకారణం అని అన్నారు. ఈ సంద‌ర్భంగా మాతృభాషను భవిష్యత్ తరాలకు పదిలంగా అందించాల‌ని పిలుపునిచ్చారు. 

ఆ లక్ష్యంగా నిర్వహిస్తోన్న ఈ మహాసభలు జరిగే ప్రాంగణానికి, అమరజీవి పొట్టి శ్రీరాములు పేరును పెట్టడం అనేది ఆ మహానుభావుడు తెలుగు జాతి కోసం చేసిన అద్వితీయ త్యాగాన్ని ప్రతి ఒక్కరికీ గుర్తు చేస్తోందని పేర్కొన్నారు. అలాగే ప్రధాన వేదికకు తెలుగు భాషాభివృద్ధి కోసం గణనీయ కృషి చేసిన రామోజీరావు పేరు పెట్టడం కూడా అభినందనీయం అన్నారు. 

ఇక ఈ మహాసభలకు విచ్చేసిన అతిథులకు, పాల్గొంటున్న తెలుగు భాషాభిమానులు అందరికీ ముఖ్య‌మంత్రి ధన్యవాదాలు తెలిపారు. ఈ మహాసభలు విజయవంతం అవ్వాలని కోరుకుంటూ... నిర్వాహకులకు ప్రత్యేక అభినందనలు తెలియజేశారు.