తమిళ సినీ పరిశ్రమలోనూ లైంగిక వేధింపులు... నటి సౌమ్య సంచలన ఆరోపణలు

మలయాళ సినీ ఇండస్ట్రీలో జస్టిస్ హేమ కమిటీ నివేదిక తీవ్ర ప్రకంపనలు రేపుతోంది. పలువురు మహిళా ఆర్టిస్టులు మీడియా ముందుకు వచ్చి గతంలో తాము ఎదుర్కొన్న లైంగిక వేదింపులు, చేదు అనుభవాలను వెల్లడిస్తున్న క్రమంలో పలువురు మలయాళ సినీ నటులపై కేసులూ నమోదు అయ్యాయి. ఈ  వ్యవహారం చల్లారకముందే తమిళ సినీ ఇండస్ట్రీలోనూ లైంగిక వేధింపులు ఉన్నాయంటూ ఓ నటి ఆరోపణలు చేయడం తీవ్ర సంచలనం అయింది. ఒక దర్శకుడు తనపై లైంగిక వేధింపులకు పాల్పడ్డారని నటి సౌమ్య ఆరోపించింది. ఓ జాతీయ మీడియాకు ఇచ్చిన ఇంటర్వ్యూలో ఆమె సంచలన విషయాలను బయటపెట్టారు. కూతురని పిలుస్తూనే నీచంగా ఆ దర్శకుడు ప్రవర్తించాడని సౌమ్య చెప్పింది. 
 
18 ఏళ్ల వయసులోనే తెలిసిన వారి ద్వారా తనకు సినిమాలో అవకాశం వచ్చిందని, దర్శకుడు నచ్చజెప్పడంతో తన ఇంట్లో వారు సుముఖత వ్యక్తం చేశారన్నారు. మొదటి మీటింగ్‌లోనే ఆ దర్శకుడి ప్రవర్తన తనకు నచ్చలేదని చెప్పింది.  కొన్ని రోజుల తర్వాత తనతో అసభ్యంగా ప్రవర్తించడం మొదలు పెట్టాడని, ఆయన భార్య ఇంట్లో లేని సమయంలో అత్యాచారానికి పాల్పడ్డాడని చెప్పింది. దాదాపు ఏడాది పాటు ఇదే పరిస్థితి కొనసాగిందని పేర్కొంది. అతను తననొక సెక్స్ బానిసగా చేశాడని, తన బాధను ఎవరితోనూ పంచుకోలేకపోయానని ఆవేదన వ్యక్తం చేసింది. ఆ దర్శకుడు ఎవరు అనేది పేరు చెప్పడానికి అంగీకరించని నటి సౌమ్య .. మలయాళ సినీ ఇండస్ట్రీకి సంబంధించి వేధింపుల కేసులను దర్యాప్తు చేస్తున్న ప్రత్యేక బృందం (సిట్) కు మాత్రమే తాను వివరాలు వెల్లడిస్తానని చెప్పింది.