బిర్యానీ ఆర్డర్లల్లో నగరవాసులే టాప్.. స్విగ్గీ నివేదికలో వెల్లడి

మహానగరాల్లోని ప్రజలకు ఆన్‌లైన్‌లో ఆహారం ఆర్డరివ్వడం అలవాటుగా మారిపోయింది. స్విగ్గీ, జొమాటోలకు డిమాండ్ నానాటికీ పెరుగుతోంది. మరోవైపు, సంవత్సరాంతం వచ్చేసిన నేపథ్యంలో స్విగ్గీ ఈ ఏడాది అత్యధికంగా ఆర్డర్స్ వచ్చిన వంటకాల గురించి ఓ నివేదిక విడుదల చేసింది. హౌ ఇండియా స్విగ్గీడ్-2023 పేరిట విడుదలైన ఈ నివేదికలో పలు ఆసక్తికర విషయాలు వెల్లడయ్యాయి. 

బిర్యానీపై హైదరాబాద్ నగరవాసుల అభిమానం మరోసారి తేటతెల్లమైంది. దేశంలోని నగరాల్లోకెల్లా హైదరాబాద్‌లో అత్యధికంగా బిర్యానీ ఆర్డర్లు వచ్చినట్టు స్విగ్గీ తన నివేదికలో పేర్కొంది. అంతేకాకుండా, ఈ ఏడాది అత్యధికంగా స్విగ్గీలో అమ్ముడైన వంటకమూ బిర్యానీనే! వరసగా ఎనిమిదో ఏడాది బెస్ట్ ఆర్డర్డ్ డిష్‌గా బిర్యానీ నిలిచింది. సెకెనుకు 2.5 బిర్యానీలు అమ్ముడుపోయాయని నివేదికలో తేలింది. జవవరిలో ఏకంగా 4.30 లక్షల బిర్యానీలకు ఆర్డర్లు అందాయి. జనవరి 1 నుంచి నవంబర్ 23 వరకూ మొత్తం 2.49 బిర్యానీ ఆర్డర్లు వచ్చాయి. అయితే, హైదరాబాద్‌కు చెందిన ఓ వ్యక్తి ఈ ఏడాది ఏకంగా 1,633 బిర్యానీలు ఆర్డర్లు చేయడం నివేదికలోని మరో విశేషం. దీంతోపాటూ హైదరాబాద్ వాసులు మొత్తం రూ.6 లక్షల విలువైన ఇడ్లీలు ఆర్డర్ చేశారు. అత్యధికంగా ఆర్డర్లు నమోదైన నగరాల్లో ఢిల్లీ, చెన్నై తరువాతి స్థానంలో హైదరాబాద్ నిలిచింది.