Barrelakka: మూడో రౌండ్ అనంతరం బర్రెలక్క పరిస్థితి ఇలా ఉంది!
- తెలంగాణ అసెంబ్లీ ఎన్నికల్లో ఇండిపెండెంట్ గా బర్రెలక్క
- కొల్లాపూర్ నుంచి బరిలో దిగిన వైనం
- మూడు రౌండ్ల అనంతరం బర్రెలక్కకు లభించిన ఓట్లు 983
- కొల్లాపూర్ లో లీడింగ్ లో కాంగ్రెస్ అభ్యర్థి జూపల్లి కృష్ణారావు
ఈసారి తెలంగాణ అసెంబ్లీ ఎన్నికల్లో ప్రముఖ నేతలతో పాటు అత్యధికంగా వినిపించిన పేరు బర్రెలక్క. ఆమె అసలు పేరు కర్నె శిరీష. ఉద్యోగం రాకపోవడంతో బర్రెలు కాస్తున్నానంటూ ఆమె చేసిన ఓ వీడియోతో పాప్యులారిటీ రావడమే కాదు, బర్రెలక్క అనే పేరు లభించింది.
బర్రెలక్క తెలంగాణ ఎన్నికల్లో కొల్లాపూర్ నియోజకవర్గం నుంచి స్వతంత్ర అభ్యర్థిగా పోటీ చేసింది. పోస్టల్ బ్యాలెట్ ఓట్లలో ముందంజ వేసిన ఈ యువతి... ఈవీఎం ఓట్ల లెక్కింపునకు వచ్చేసరికి డీలాపడిపోయింది.
ఉమ్మడి మహబూబ్ నగర్ జిల్లా కొల్లాపూర్ నియోజకవర్గంలో మూడు రౌండ్ల ఓట్ల లెక్కింపు అనంతరం కేవలం 983 ఓట్లు మాత్రమే పొందింది. ప్రస్తుతం ఈ నియోజకవర్గంలో కాంగ్రెస్ అభ్యర్థి, మాజీ మంత్రి జూపల్లి కృష్ణారావు ఆధిక్యంలో కొనసాగుతున్నారు.
