సెలెబ్రిటీ క్రికెట్ లీగ్ విజేతగా నిలిచిన టాలీవుడ్ జట్టు

మొత్తం 8 జట్లు పాల్గొన్న సెలెబ్రిటీ క్రికెట్ లీగ్ (సీసీఎల్)లో టాలీవుడ్ జట్టు తెలుగు వారియర్స్ టైటిల్ విజేతగా అవతరించింది. నిన్న విశాఖపట్నంలో జరిగిన ఫైనల్లో తెలుగు వారియర్స్... భోజ్ పురి దబాంగ్స్ పై విజయం సాధించింది. 

ఈ మ్యాచ్ లో టాస్ గెలిచి తెలుగు వారియర్స్.... భోజ్ పురి జట్టుకు బ్యాటింగ్ అప్పగించింది. తొలి ఇన్నింగ్స్ లో భోజ్ పురి జట్టు 6 వికెట్లకు 72 పరుగులు చేయగా, తెలుగు వారియర్స్ జట్టు తొలి ఇన్నింగ్స్ లో 4 వికెట్లకు 104 పరుగులు చేసింది. కెప్టెన్ అఖిల్ అక్కినేని 67 పరుగులతో టాప్ స్కోరర్ గా నిలిచాడు. 

రెండో ఇన్నింగ్స్ లో భోజ్ పురి టీమ్ 6 వికెట్లకు 89 పరుగులు చేయగా... 58 పరుగుల టార్గెట్ ను తెలుగు వారియర్స్ జట్టు ఈజీగా ఛేదించింది. కేవలం ఒక వికెట్ (తమన్) చేజార్చుకుని విజయం సాధించింది. అశ్విన్, సచిన్ అజేయంగా నిలిచారు. అఖిల్ అక్కినేనికి మ్యాన్ ఆఫ్ ద మ్యాచ్, మ్యాన్ ఆఫ్ ద సిరీస్ అవార్డులు దక్కాయి. 

సీసీఎల్ చరిత్రలో తెలుగు వారియర్స్ కు ఇది నాలుగో టైటిల్. గతంలో 2015, 2016, 2017లో వరుసగా మూడు టైటిళ్లు చేజిక్కించుకుని హ్యాట్రిక్ నమోదు చేసింది. కరోనా సంక్షోభం కారణంగా గత మూడేళ్లుగా సీసీఎల్ టోర్నీ నిర్వహించలేదు.