బ్యాటింగ్ లో రాణించిన బౌలర్... కుప్పకూలే ప్రమాదం నుంచి తప్పించుకున్న కోల్ కతా
- అబుదాబిలో ముంబయితో కోల్ కతా మ్యాచ్
- చేతులెత్తేసిన కోల్ కతా టాపార్డర్
- ప్యాట్ కమ్మిన్స్ అర్ధసెంచరీ
- కెప్టెన్ మోర్గాన్ తో కీలక భాగస్వామ్యం
కమ్మిన్స్ 36 బంతుల్లో 5 ఫోర్లు, 2 సిక్స్ లతో 53 పరుగులు చేసి నాటౌట్ గా నిలిచాడు. మరో ఎండ్ లో కొత్త కెప్టెన్ మోర్గాన్ 29 బంతుల్లో 2 ఫోర్లు, 2 సిక్స్ లతో 39 పరుగులు నమోదు చేశాడు. ఇన్నింగ్స్ చివరి బంతికి మోర్గాన్ ఓ కళ్లు చెదిరే భారీ సిక్స్ సంధించాడు.
61 పరుగులకే 5 వికెట్లు కోల్పోయిన స్థితి నుంచి కోల్ కతాను ఓ మోస్తరు స్కోరుకు తీసుకువచ్చిన ఘనత నిస్సందేహంగా కమ్మిన్స్ కే దక్కుతుంది. తాను ఓ బౌలర్ అయినా గానీ బ్యాట్స్ మెన్ విఫలమైన చోట ఎంతో పట్టుదలతో ఆడి స్కోరు బోర్డు ముందుకు నడిపించాడు. ముంబయి ఇండియన్స్ బౌలర్లలో లెగ్ స్పిన్నర్ రాహుల్ చహర్ 2 వికెట్లు తీయగా, బౌల్ట్, కౌల్టర్ నైల్, బుమ్రా తలో వికెట్ తీశారు.
