తెలుగు సినిమాకి పాట పాడిన నిత్యా మీనన్!

మన కథానాయికలలో మంచి సింగర్స్ కూడా వున్నారు. సంగీతం పట్ల ఎంతో అభిరుచి వున్న ఈ తారలు అప్పుడప్పుడు సినిమాలలో తమ గళం వినిపిస్తూ సింగర్స్ గా కూడా అలరిస్తూ వుంటారు. ఇలాంటి వాళ్లల్లో నిత్యా మీనన్ కూడా వుంది.

తెలుగులో 'అలా మొదలైంది' సినిమాతో మొదలెట్టి కథానాయికగా పలు సినిమాలలో నటించి, పేరు తెచ్చుకున్న ఈ మల్లూబేబీ అప్పుడప్పుడు గొంతుకూడా సవరిస్తూ తన గానాన్ని కూడా మనకు వినిపిస్తూ వుంటుంది. అలాగే, తాజాగా ఈ ముద్దుగుమ్మ 'నిన్నిలా నిన్నిలా' అనే తెలుగు సినిమా కోసం ఓ పాట పాడింది.

ప్రముఖ మలయాళ దర్శకుడు దివంగత ఐవీ శశి తనయుడు అనీ శశి ఈ చిత్రం ద్వారా దర్శకుడిగా పరిచయం అవుతున్నాడు. ఇందులో అశోక్ సెల్వన్ హీరోగా నటిస్తుండగా, నిత్యామీనన్, రీతు వర్మ హీరోయిన్లుగా నటిస్తున్నారు. ఇటీవల ఈ చిత్రం కోసం నిత్య పాడిన పాటను బెంగళూరులోని రఘు దీక్షిత్ స్టూడియోలో రికార్డు చేశారు.

ఇదిలావుంచితే, యూకేలో ఉంటున్న సరోద్ విద్వాంసుడు సౌమిక్ దత్తాతో కలసి నిత్యామీనన్ తన తొలి ఇంగ్లిష్ సింగిల్ ను తీసుకురానుంది.