ఆదాశర్మ చిత్రానికి క్వశ్చన్ మార్క్ టైటిల్!

అది చిన్న సినిమా అయినా, పెద్ద సినిమా అయినా ముందుగా దాని టైటిల్ బాగుండాలి. టక్కున ఆకట్టుకోవాలి. అప్పుడే ఆ సినిమా పట్ల ప్రేక్షకులలో ఆసక్తి మొదలవుతుంది. అందుకే, దర్శక నిర్మాతలు కాస్త టైం తీసుకుని, ఎంతో ఆలోచించి మరీ తమ సినిమాలకు టైటిళ్లు నిర్ణయిస్తుంటారు.

తాజాగా ముద్దుగుమ్మ ఆదా శర్మ నటిస్తున్న చిత్రానికి కూడా అలాగే ? (క్వశ్చన్ మార్క్) అనే గమ్మత్తయిన టైటిల్ని పెట్టారు. దీనికి సంబంధించిన టైటిల్ లోగోని విడుదల చేశారు. విప్రా దర్శకత్వంలో గౌరీకృష్ణ నిర్మిస్తున్న ఈ చిత్రం షూటింగ్ పూర్తయింది. ప్రస్తుతం పోస్ట్ ప్రొడక్షన్ పనులు జరుగుతున్నాయి.

ఈ సందర్భంగా కథానాయిక ఆదా శర్మ చెబుతూ, ఇది హారర్ సినిమా అనీ, దీనికి ? అనే టైటిల్ కరెక్టుగా సరిపోతుందని చెప్పింది. క్వశ్చన్ మార్క్ అంటే ఇక్కడ ఏమిటి? ఎందుకు ఆ టైటిల్ పెట్టాం? అన్నవి ఆసక్తికరంగా ఉంటాయన్నారు. దర్శక నిర్మాతలు మాట్లాడుతూ, టైటిల్ కి మంచి స్పందన వస్తోందని సంతోషాన్ని వ్యక్తం చేశారు. కరోనా కాలంలో అన్ని జాగ్రత్తలూ తీసుకుని షూటింగుని పూర్తిచేశామని, హైదరాబాదు పరిసరాల్లోనే షూటింగ్ జరిపామని చెప్పారు.