యాక్టివా ధరలను పెంచిన హోండా!

ఇటీవల భారత టూ వీలర్ మార్కెట్లో విడుదలైన యాక్టివా 6జీ ధరలను రూ.955 మేరకు పెంచుతున్నట్టు హోండా వెల్లడించింది. ఈ వేరియంట్ స్టాండర్డ్ మోడల్ ధర ఇకపై రూ.65,419 అని, డీలక్స్ వేరియంట్ ధర రూ. 66,919 (ఎక్స్ షోరూమ్, న్యూఢిల్లీ)గా ఉంటుందని సంస్థ వెల్లడించింది. ఈ సంవత్సరం జనవరిలో ఈ స్కూటర్ మార్కెట్లోకి రాగా, ఏప్రిల్ లో రూ.522 మేరకు ధరను పెంచిన సంస్థ, మూడు నెలలు తిరిగేసరికి మరోసారి ధరలను పెంచడం గమనార్హం. ఈ ధరల పెంపునకు కారణాన్ని సంస్థ వెల్లడించలేదు.

కాగా, ఇండియాలో బెస్ట్ సెల్లింగ్ స్కూటర్ గా యాక్టివా కొనసాగుతోంది. యాక్టివాలో ఆరవ తరం వాహనంగా వచ్చిన 6జీలో ఇంజన్ స్టార్ట్ - స్టాప్ స్విచ్, మల్టీ ఫంక్షన్ ఇగ్నిషన్ కీ, ఎక్స్ టర్నల్ ఫ్యూయల్ క్యాప్ తదితర సౌకర్యాలు ఉంటాయి. బీఎస్-6 నిబంధనలను కూడా ఇది పాటిస్తుంది. 110 సీసీ సింగిల్ సిలిండర్ ఇంజన్ తో ఇది లభిస్తుందన్న సంగతి తెలిసిందే. ఆరు విభిన్న రంగుల్లో ఇది లభిస్తుంది. డీలక్స్ మోడల్ లో ఎల్ఈడీ హెడ్ లైట్ ను కలిగివుంటుంది.