నాని చిత్రానికి ఓకే చెప్పిన సాయిపల్లవి!

మన కథానాయికలలో సాయిపల్లవికి ఓ ప్రత్యేకత వుంది. మిగతా వాళ్లలా తను ఏ సినిమా పడితే ఆ సినిమా ఒప్పేసుకోదు. కథ నచ్చాలి.. అందులో తన పాత్ర నచ్చాలి.. పాత్ర డీసెంట్ గా వుండాలి.. ఎక్స్ పోజింగ్ వుండకూడదు.. అలా అయితేనే ఆమె ఓకే చెబుతుంది. లేకపోతే వెంటనే సారీ చెప్పేస్తుంది. అలాంటి సాయిపల్లవి తాజాగా నాని సరసన ఓ చిత్రంలో నటించడానికి గ్రీన్ సిగ్నల్ ఇచ్చినట్టు సమాచారం.

ఆమధ్య 'టాక్సీవాలా' చిత్రాన్ని రూపొందించిన రాహుల్ సాంకృత్యన్ దర్శకత్వంలో నాని ఓ సినిమా చేయనున్నాడు. దీనికి 'శ్యాం సింగ రాయ్' అనే టైటిల్ ను అప్పుడే నిర్ణయించారు కూడా. ఇందులో కథానాయిక పాత్రకు సాయిపల్లవిని అడిగినట్టూ, కథ నచ్చి ఆమె ఓకే చెప్పినట్టూ తెలుస్తోంది.

ఇక, అసలు లాక్ డౌన్ లేకపోతే ఈ చిత్రం షూటింగ్ ఈ పాటికి చాలా వరకు జరిగిపోయేది. దాని కారణంగా వాయిదా పడింది. ఇక ఇప్పుడు షూటింగులు మొదలు కానున్న నేపథ్యంలో దీనికి ఏర్పాట్లు చేస్తున్నారు. కథ ప్రకారం కోల్ కతా లో చేయాల్సిన షూటింగును హైదరాబాదులోనే సెట్స్ వేసి పూర్తిచేస్తారట.