మే 4 నుంచి కూడా ప్రజా రవాణా అనుమానమే... 15 తరువాత ఆలోచించాలని కేంద్ర మంత్రుల కీలక నిర్ణయం!

తొలుత 21 రోజులు, ఆపై 19 రోజులు... మొత్తం 40 రోజుల లాక్ డౌన్ మే 3తో ముగియనుండగా, 4వ తేదీ నుంచి విమానాలు, రైళ్లు నడవటం అనుమానమేనని తెలుస్తోంది. ఈ విషయంలో ఇంతవరకూ స్పష్టమైన ప్రకటనేదీ కేంద్రం నుంచి వెలువడలేదు. అయితే, నిన్న రక్షణ మంత్రి రాజ్ నాథ్ సింగ్ అధ్యక్షతన సమావేశమైన కేంద్ర మంత్రులు, ప్రయాణాలను మే 15 తరువాత అనుమతించే ఆలోచన చేయాలని సిఫార్సు చేసినట్టు తెలుస్తోంది. ఈ సమావేశానికి కేంద్ర మంత్రులు స్మృతీ ఇరానీ, హర్ దీప్ సింగ్ పూరిలతోపాటు ఉన్నతాధికారులు కొందరు హాజరయ్యారు.

"విమానాల సర్వీసులపై ఎటువంటి నిర్ణయాన్నీ తీసుకోలేదు. ఇదే సమయంలో విమానాలను పార్కింగ్ చేసి వుండటం ఆయా సంస్థల ఖర్చును పెంచుతోంది. మే 4 నుంచి కూడా ప్రయాణాలపై ఆంక్షలు ఉండవచ్చు. 15 తరువాత పరిస్థితిపై తదుపరి సమీక్షలో నిర్ణయం తీసుకునే అవకాశాలు ఉన్నాయి" అని ఇదే సమావేశానికి హాజరై, పేరును వెల్లడించేందుకు ఇష్టపడని ఓ సీనియర్ అధికారి వ్యాఖ్యానించారు. విమాన సర్వీసుల విషయమై ఆ శాఖ మంత్రి హర్ దీప్ సింగ్ పూరి స్పందించేందుకు నిరాకరించారు.

"ఇండియాలో విమానాలు, రైళ్ల రాకపోకలను పునరుద్ధరించేందుకు ఓ తేదీని నిర్ణయించలేదు. నిజం చెప్పాలంటే ఇందుకు కొంత సమయం పడుతుంది. ప్రజా రవాణా పునరుద్ధరణ అంటే, లాక్ డౌన్ పూర్తిగా తొలగినట్టుగా భావించవచ్చు" అని మరో అధికారి వ్యాఖ్యానించారు. కాగా, ఎయిర్ ఇండియా మే 4 నుంచి దేశవాళీ సర్వీసులకు, జూన్ 1 నుంచి విదేశీ సర్వీసులను టికెట్ల బుకింగ్ ను ప్రారంభించింది.