మలయాళ రీమేక్ లో బాలయ్యతో పాటు మంచు విష్ణు?

మలయాళంలో ఇటీవల వచ్చిన 'అయ్యప్పనుం కోశియుం' అనే సినిమా అక్కడ వైవిధ్యభరితమైన చిత్రంగా విమర్శకుల చేత ప్రశంసలు అందుకుంది. పృథ్వీరాజ్ సుకుమారన్ .. బిజూ మీనన్ కెరియర్లో చెప్పుకోదగిన చిత్రంగా నిలిచింది. దాంతో ఈ సినిమాను తెలుగులో రీమేక్ చేయాలనే ఉద్దేశంతో నిర్మాత సూర్య దేవర నాగవంశీ వున్నారు. ఈ కథలో రెండు బలమైన పాత్రలు ప్రధానమైనవిగా కనిపిస్తాయి.

ఒక పాత్ర కోసం ఆయన బాలకృష్ణను అనుకున్నారు. బాలకృష్ణను ఒప్పించగలననే నమ్మకంతో వున్నారు. మరో పాత్ర కోసం ఓ యంగ్ హీరో అవసరం కావడంతో, కొంతమంది పేర్లను పరిశీలించిన ఆయన మంచు విష్ణు అయితే బాగుంటుందని అనుకుంటున్నట్టుగా సమాచారం. ఆ దిశగా ప్రయత్నాలు జరుగుతున్నాయని చెబుతున్నారు. బాలకృష్ణకి .. మంచు ఫ్యామిలీకి మధ్య మంచి సాన్నిహిత్యం వుంది. అందువలన ఈ కాంబినేషన్ సెట్ కావొచ్చనే అనుకుంటున్నారు.