లిబియాలో సైనికులపై రాకెట్ దాడి... 28 మంది మృతి!

లిబియా రాజధాని ట్రిపోలీలోని ఓ సైనిక పాఠశాలపై కొందరు ముష్కరులు వైమానిక దాడులకు తెగబడగా, 28 మంది సైనికులు మరణించారు. మరో 12 మంది ఈ ఘటనలో తీవ్రంగా గాయపడ్డారు. ఈ విషయాన్ని లిబియా ఆరోగ్య మంత్రిత్వ శాఖ ప్రతినిధి అమీన్ అల్ హమేషీ వెల్లడించారు. సైనికులంతా పరేడ్ గ్రౌండ్ లో సమావేశమైన వేళ, ఈ ఘటన జరిగింది. వీరంతా తమ గుడారాల్లోకి వెళుతుండగా, విమానాల నుంచి రాకెట్లను జార విడిచినట్టు తెలుస్తోంది. తీవ్రంగా గాయపడిన సైనికులకు రక్తం అవసరమని, దాతలు స్వచ్ఛందంగా ముందుకు రావాలని ప్రభుత్వం కోరింది.