ఒక హీరోగా వెంకటేశ్ .. మరో హీరోగా నాని?

కొంతకాలంగా వెంకటేశ్ మల్టీ స్టారర్ చిత్రాలకు ప్రాధాన్యతనిస్తూ వస్తున్నాడు. ఆ మధ్య 'ఎఫ్ 2' చిత్రంతో హిట్ కొట్టేసిన వెంకటేశ్, ఈ నెల 13వ తేదీన 'వెంకీమామ' సినిమాతో ప్రేక్షకులను పలకరించనున్నాడు. ఈ సినిమా తరువాత ఆయన 'అసురన్' రీమేక్ లో చేయనున్నాడు. సురేశ్ ప్రొడక్షన్స్ బ్యానర్ పై ఈ సినిమా నిర్మితం కానుంది. త్వరలోనే ఈ సినిమా సెట్స్ పైకి వెళ్లనుంది. ప్రస్తుతం అందుకు సంబంధించిన సన్నాహాలు చకచకా జరుగుతున్నాయి.

ఆ తరువాత ప్రాజెక్టుకి కూడా రంగం సిద్ధమవుతుందనేది తాజా సమాచారం. ఇటీవల ఆకుల శివ వినిపించిన ఒక కథ సురేశ్ బాబుకి బాగా నచ్చిందట. ఈ మల్టీస్టారర్ కథలో, ఒక కథానాయకుడిగా వెంకటేశ్ .. మరో కథానాయకుడిగా నాని పేర్లు వినిపిస్తున్నాయి. నాని అయితేనే బాగుంటుందనే అభిప్రాయాన్ని సురేశ్ బాబు వ్యక్తం చేశారట. గతంలో నాగార్జునతో 'దేవదాసు' చేసిన నాని, వెంకటేశ్ తోను కలిసి కనిపిస్తాడన్న మాట.