ఖాళీ బాటిళ్లతో పెట్రోల్ కోసం వస్తే వారి ఫొటో తీయండి: శంషాబాద్ డీసీపీ ఆదేశాలు

తహసీల్దార్ విజయారెడ్డి, దిశ ఘటనలతో పెట్రోల్ బంకుల్లో ఖాళీ బాటిళ్లలో పెట్రోలు విక్రయాలపై పోలీసులు హెచ్చరిక జారీ చేశారు. బాటిళ్లలో పెట్రోల్ పోసి విక్రయించే బంక్ ల యాజమాన్యంపై చట్టపరమైన చర్యలు తప్పవని శంషాబాద్ డీసీపీ ప్రకాశ్‌రెడ్డి తెలిపారు. అంతేకాదు, ఖాళీ బాటిళ్లతో వచ్చి పెట్రోల్ అడిగే వారి వివరాలను బంకుల సిబ్బంది తీసుకోవాలని, వారి ఫొటోను కూడా స్మార్ట్ ఫోన్ లో తీయాలని చెప్పారు.

ఈ మేరకు తమ జోన్ పరిధిలోని అన్ని పెట్రోలు బంక్‌లకు నోటీసులు జారీ చేస్తున్నామని వివరించారు. తాము చేస్తోన్న సూచనలను పెట్రోల్ బంకుల యాజమాన్యాలు తప్పకుండా పాటించాలని తెలిపారు. బంక్ యజమానులు, నిర్వాహకులు, సిబ్బందికి అవగాహన కార్యక్రమాలు కూడా నిర్వహిస్తామని వివరించారు.