మహారాష్ట్ర రాజకీయ పరిణామాల్లో మోదీ జోక్యం కూడా ఉంది: సిద్ధరామయ్య

మహారాష్ట్రలో బీజేపీ ప్రభుత్వం కుప్పకూలడం బీజేపీకి చెంపపెట్టులాంటిదని కర్ణాటక మాజీ ముఖ్యమంత్రి సిద్ధరామయ్య  అన్నారు. మహారాష్ట్ర రాజకీయ పరిస్థితులను ప్రస్తావిస్తూ బీజేపీపై ఆయన విమర్శలు గుప్పించారు. మహారాష్ట్ర రాజకీయ పరిణామాల్లో ప్రధానమంత్రి మోదీ జోక్యం కూడా ఉందన్నారు.

ఈ రోజు సిద్ధరామయ్య ఓ ఇంటర్వ్యూలో మాట్లాడుతూ..  'మహారాష్ట్రలో జరిగిన పరిణామాలు బీజేపీకి చెంపపెట్టువంటివి. తమకు మెజారిటీ లేదని తెలిసినప్పటికీ బీజేపీ నేత ఫడ్నవీస్.. ముఖ్యమంత్రిగా ఎలా ప్రమాణ స్వీకారం చేస్తారు?' అని ప్రశ్నించారు.

'ఇది రాజ్యాంగాన్ని ఉల్లంఘించడమే అవుతుంది. ప్రజాస్వామ్యాన్ని అవమాన పరిచారు. ఈ విషయంలో ప్రధాన మంత్రి నరేంద్ర మోదీ జోక్యం కూడా ఉంది. ఈ కుట్రలో ఆయన కూడా భాగస్వామే' అని సిద్ధరామయ్య విమర్శించారు. కాగా, బలపరీక్షను ఎదుర్కోవాలని నిన్న సుప్రీంకోర్టు తీర్పునిచ్చిన నేపథ్యంలో ముఖ్యమంత్రి పదవికి ఫడ్నవీస్ రాజీనామా చేసిన విషయం తెలిసిందే.