ప్రమాదం జరిగిన సమయంలో కారు 100 కిలోమీటర్ల వేగంతో వెళుతోంది: కేటీఆర్

హైదరాబాద్ లోని గచ్చిబౌలి బయోడైవర్సిటీ ఫ్లైఓవర్ పైనుంచి ఓ కారు కిందపడిపోయిన ఘటనపై తెలంగాణ మంత్రి కేటీఆర్ స్పందించారు. ఈ ఫ్లైఓవర్ పై 40 కిలోమీటర్ల వేగం మించరాదని హెచ్చరిక బోర్డులు స్పష్టంగా పేర్కొంటున్నాయని, కానీ ప్రమాదం జరిగిన సమయంలో కారు 100 కిలోమీటర్ల వేగంతో వెళుతోందని, అతివేగంతో అదుపుతప్పిందని తెలిపారు.

 ఏదేమైనా రోడ్డుపై వెళుతున్న ఓ పాదచారి దుర్మరణం పాలవడం విషాదకరం అని తీవ్ర విచారం వ్యక్తం చేశారు.  ఈ వ్యవహారంపై పూర్తిస్థాయిలో విచారణ జరిపి, ఫ్లైఓవర్ డిజైన్ లో ఏమైనా లోపాలున్నాయేమోనని పరిశీలిస్తామని వెల్లడించారు. కాగా, చీఫ్ ఇంజినీర్ల సూచన మేరకు ఫ్లైఓవర్ ను తాత్కాలికంగా మూసివేస్తున్నట్టు కేటీఆర్ ప్రకటించారు.