తమ దేశంలోకి అక్రమంగా వచ్చారని... భారతీయుల కాళ్లూ చేతులూ కట్టేసి డిపోర్ట్ చేసిన అమెరికా!

తమ దేశంలోకి అక్రమంగా ప్రవేశించారని ఆరోపిస్తూ, కాళ్లూ, చేతులు కట్టేసి మరీ తమను డిపోర్ట్ చేశారని 145 మంది ఇండియన్స్ వాపోయారు. భారత అధికారుల నుంచి తాత్కాలిక పత్రాలను పొందిన అమెరికన్ ఎంబసీ అధికారులు, వాటిని యూఎస్ కు పంపడంతో వలసదారుల శిబిరంలో నిర్బంధంలో ఉన్న వీరందరికీ విముక్తి లభించింది. అందరినీ ప్రత్యేక విమానంలో ఇండియాకు పంపించారు. తామంతా ఈక్వెడార్‌, దక్షిణ అమెరికా దేశాల్లోని ఏజెంట్లకు లక్షల రూపాయలు చెల్లించి యూఎస్ లోకి వెళ్లామని వెల్లడించిన బాధితులు, తమను అమెరికా అధికారులు పట్టుకుని నిర్బంధించారని తెలిపారు. అధికారులు తమ పట్ల నిర్దయగా ప్రవర్తించారని బాధితులు వాపోయారు.