ప్రేమ వ్యవహారాన్ని సోషల్ మీడియాలో పెట్టిన ప్రియుడు... ప్రియురాలి పెళ్లి రద్దు!

తనతో కలిసి చెట్టాపట్టాలేసుకుని తిరిగి, ఇప్పుడు మరో యువకుడిని వివాహం చేసుకోనుందన్న అక్కసుతో చేసిన పని ఇప్పుడతన్ని కటకటాల పాలు చేసింది. న్యూఢిల్లీ సమీపంలోని నోయిడా వద్ద జరిగిన ఈ ఘటనకు సంబంధించి పూర్తి వివరాల్లోకి వెళితే, ఉత్తరప్రదేశ్ లోని కన్నౌజ్ ప్రాంతానికి చెందిన యువతి నోయిడాలో నివాసం ఉంటుండగా, ఆమెకు ఇటీవల వివాహం నిశ్చయమైంది. వివాహానికి ముందు ఓ యువకుడితో ప్రేమ వ్యవహారం నడిపిన ఆమె, గత కొంతకాలంగా అతనికి దూరంగా ఉంటోంది. అయితే, అతను మాత్రం ఆమెను వదల్లేదు.

ఈ నేపథ్యంలో తన ప్రియురాలికి వివాహం జరగబోతోందని తెలుసుకున్న అతను, గతంలో ఆమెతో కలిసివున్న సమయంలో తీసుకున్న చిత్రాలను ఫేస్ బుక్ లో అప్ లోడ్ చేయడం ప్రారంభించాడు. ఈ చిత్రాలు అటూ, ఇటూ తిరిగి వరుడికి చేరాయి. దీంతో అతను ఆగ్రహంతో వివాహాన్ని రద్దు చేసుకుని వెళ్లిపోయాడు. దీంతో బావురుమన్న వధువు, పోలీసులను ఆశ్రయించింది. కేసు నమోదు చేసిన పోలీసులు దర్యాఫ్తు చేస్తున్నారు.