మామిడిపండ్లు దొంగిలించాడని భారత కార్మికుడికి దేశ బహిష్కరణ

భారత్ కు చెందిన ఓ కార్మికుడు దుబాయ్ ఎయిర్ పోర్టులో పనిచేస్తూ రెండు మామిడిపండ్లు దొంగిలించాడు. ఈ నేరం నిరూపితం కావడంతో అతడికి దేశ బహిష్కరణ విధిస్తూ యూఏఈ న్యాయస్థానం కఠినశిక్ష విధించింది. 27 ఏళ్ల భారతీయ యువకుడు దుబాయ్ విమానాశ్రయంలో ప్రయాణికుల లగేజీని కంటెయినర్ నుంచి కన్వేయర్ బెల్టుపై ఉంచడం వంటి విధులు నిర్వర్తించేవాడు. 2017లో ఓ లగేజీ నుంచి రెండు మామిడిపండ్లు దొంగతనం చేశాడు.

ఈ విషయంపై ఫిర్యాదు అందుకున్న అధికారులు ఆ యువకుడిపై పోలీసులకు ఫిర్యాదు చేశారు. విచారణ సందర్భంగా తన తప్పును అంగీకరించిన ఆ యువకుడు దొంగతనం ఎందుకు చేయాల్సి వచ్చిందో వివరించాడు. బాగా ఆకలి వేస్తుండడంతో పాటు దాహంగా ఉండడంతో మామిడిపండ్లను తీసుకున్నానని వెల్లడించాడు. అయితే తప్పు తప్పేనంటూ యూఏఈ న్యాయస్థానం దేశ బహిష్కరణ శిక్ష విధించింది. దాంతోపాటే నగదు జరిమానా కూడా వడ్డించింది.