వంద రోజులు కాదు వందేళ్లు పాలించినా మాకు వాళ్లు మంచి సర్టిఫికెట్స్ ఇస్తారా?: అంబటి రాంబాబు

వందరోజులు కాదు వందేళ్లు పాలించినా తమకు చంద్రబాబు, పవన్ కల్యాణ్ లు మంచి సర్టిఫికెట్స్ ఇస్తారా? అని వైసీపీ ఎమ్మెల్యే అంబటి రాంబాబు ప్రశ్నించారు. తాడేపల్లిలో ఈరోజు ఏర్పాటు చేసిన విలేకరుల సమావేశంలో ఆయన మాట్లాడుతూ, జనసేన పార్టీ మేనిఫెస్టో 22 పేజీలు ఉంటే, వైసీపీ ప్రభుత్వం వందరోజులపాలనపై వారు చేసిన విమర్శలు 33 పేజీల్లో ఉన్నాయని విమర్శించారు. చంద్రబాబునాయుడు ఏ అంశాలను అయితే క్లుప్తంగా చెప్పారో, అవే అంశాలను కాస్త వివరంగా పవన్ కల్యాణ్ తన నివేదిక ద్వారా విమర్శించారని అన్నారు.

జగన్ వందరోజుల పాలనను విమర్శిస్తూ చంద్రబాబు, పవన్ విడుదల చేసిన పుస్తకాల గురించి అంబటి ప్రస్తావిస్తూ, ఈ విమర్శలను చూస్తుంటే.. వీళ్లిద్దరూ కలిసి కూర్చుని ఇలా రాసుకున్నారా? లేక చంద్రబాబు ముందు బెంచ్ లో కూర్చుని రాస్తుంటే  ఆయన వెనుక బెంచ్ లో కూర్చుని పవన్ కాపీ కొట్టాడా? అంటూ సెటైర్లు విసిరారు. ‘వీళ్లేమన్నా మాకు మంచి సర్టిఫికెట్లు ఇస్తారా? వందరోజులు కాదు వందేళ్లు మేము పరిపాలన చేసినా వాళ్లు మంచి సర్టిఫికెట్లు ఇస్తారని మేము ఆశించలేదు’ అని అన్నారు.