పాపం కివీస్!... టాస్ గెలిచినా ఆనందంలేదు!... 6 ఓవర్లలో చేసింది 8 పరుగులే!

మాంచెస్టర్ లోని ఓల్డ్ ట్రాఫర్డ్ మైదానంలో జరుగుతున్న వరల్డ్ కప్ సెమీస్ లో న్యూజిలాండ్ టాస్ గెలిచినా పరిస్థితులు అనుకూలించడంలేదు. ఆరంభంలో ధాటిగా ఆడి భారీగా పరుగులు చేయాలని కివీస్ మేనేజ్ మెంట్ ఆశించినా, టీమిండియా కొత్తబంతి బౌలర్లు వారికి ఆ అవకాశం ఇవ్వలేదు. బుమ్రా, భువనేశ్వర్ నిప్పులు చెరిగే బంతులు విసరడంతో న్యూజిలాండ్ బ్యాట్స్ మెన్ కనీసం సింగిల్స్ తీయడానికి కూడా సాహసించలేకపోతున్నారు. ఆ జట్టు 6 ఓవర్లలో ఒక వికెట్ నష్టపోయి 8 పరుగులు మాత్రమే చేయగలిగిందంటే భారత బౌలర్లు ఎంత పకడ్బందీగా బౌలింగ్ చేస్తున్నారో అర్ధమవుతుంది. కేవలం 1 పరుగు చేసిన డాషింగ్ ఓపెనర్ మార్టిన్ గప్టిల్ ను బుమ్రా ఓ అద్భుతమైన డెలివరీతో పెవిలియన్ చేర్చాడు. ప్రస్తుతం క్రీజులో ఓపెనర్ హెన్రీ నికోల్స్, కెప్టెన్ కేన్ విలియమ్సన్ ఆడుతున్నారు.