ప్రపంచంలోనే అత్యంత శక్తిమంతమైన నాయకుడు మోదీ: బ్రిటీష్ హెరాల్డ్ పోల్

ప్రధాని మోదీ అంతర్జాతీయ స్థాయిలో తిరుగులేని నేతగా ఎదిగారని చెప్పడానికి ఇదొక ఉదాహరణ. ప్రముఖ బ్రిటీష్ మేగజీన్ 'బ్రిటీష్ హెరాల్డ్' నిర్వహించిన రీడర్స్ పోల్ లో... పవర్ ఫుల్ పర్సన్-2019గా నరేంద్ర మోదీ ఎంపికయ్యారు. ప్రపంచంలోని ఇతర నేతలను అధిగమించి మోదీ శక్తిమంతమైన నేతగా ఎంపికయ్యారని ఈ సందర్భంగా బ్రిటీష్ హెరాల్డ్ తెలిపింది. ఈ పోల్ లో 30.9 శాతం పాఠకులు మోదీకి ఓటు వేశారు.

ఈ పోల్ లో రష్యా అధినేత పుతిన్, అమెరికా అధ్యక్షుడు ట్రంప్, చైనా అధినేత జిన్ పింగ్ లను మోదీ దాటేశారు. పుతిన్ కు 29.9 శాతం, ట్రంప్ కు 21.9 శాతం, జిన్ పింగ్ కు 18.1 శాతం ఓట్లు పడ్డాయి. ఈ పోల్ కోసం 25 మంది ప్రపంచ స్థాయి నేతలు నామినేట్ కాగా... వీరిలో నలుగురిని ఫైనల్ రౌండ్ కు ఎక్స్ పర్ట్ ప్యానల్ ఎంపిక చేసింది. ఫైనల్స్ లో మోదీ విజేతగా నిలిచారు.