చిరంజీవి 'దేవాంతకుడు' సినిమా విషయంలో అలా జరిగింది: సీనియర్ నటుడు నారాయణరావు

నటుడిగా చిరంజీవి తన కెరియర్ ను ప్రారంభించక మునుపే, నారాయణరావు సినీరంగంలోకి ప్రవేశించారు. చిరంజీవితో స్నేహం ఏర్పడిన తరువాత ఆయన హీరోగా కొన్ని సినిమాలను నిర్మించారు. అలా ఆయన నిర్మించిన చిత్రాలలో 'దేవాంతకుడు' ఒకటి. తాజా ఇంటర్వ్యూలో ఈ సినిమాను గురించి నారాయణరావు మాట్లాడుతూ, "చిరంజీవి హీరోగా 'దేవాంతకుడు' చేయడానికి రంగాన్ని సిద్ధం చేసుకుంటున్నాను. మరో 15 రోజుల్లో షూటింగు మొదలవుతుందనగా, ఆ కథతో కన్నడలో అంబరీష్ చేసిన సినిమా పరాజయంపాలైంది.

దాంతో తెలుగులో చేయాలా? వద్దా? అని ఆలోచనలో పడ్డాను. కన్నడలో ఆ సినిమా పరాజయంపాలు కావడానికి కారణం .. హీరోకన్నా విలన్ ను పవర్ ఫుల్ గా చూపించడమేనని అర్థమైంది. దాంతో ఆ లోపాన్ని తెలుగులో సరిచేయించి నిర్మించాను. తెలుగులో 'దేవాంతకుడు' సూపర్ హిట్ అయింది. ఇదే సినిమాను తమిళంలో విజయ్ కాంత్ హీరోగా రీమేక్ చేస్తే అక్కడ కూడా హిట్ అయింది. అప్పటికి సినిమాలు మానేసి మధురై వెళ్లిపోయిన విజయ్ కాంత్ ను ఈ సినిమా మళ్లీ హీరోగా నిలబెట్టేసింది" అని చెప్పుకొచ్చారు.