నా వలన నష్టపోయిన వారికి మంచి చేయడం కోసం ఎంతవరకైనా పోతాను: అల్లు అర్జున్

మలయాళంలో ప్రియా వారియర్ తాజా చిత్రంగా 'ఒరు ఆదార్ లవ్' సినిమా నిర్మితమైంది. తెలుగులో ఈ సినిమాను 'లవర్స్ డే' టైటిల్ తో ఫిబ్రవరి 14వ తేదీన విడుదల చేయనున్నారు. ఈ నేపథ్యంలో తాజాగా హైదరాబాద్ లో ఈ సినిమా ఆడియో రిలీజ్ వేడుక జరిగింది. ఈ వేడుకకి ముఖ్య అతిథిగా అల్లు అర్జున్ హాజరయ్యాడు. ఈ వేదికపై ఆయన మాట్లాడుతూ .. "మలయాళ చిత్ర పరిశ్రమతో .. అక్కడి ప్రేక్షకులతో నాకు గల అనుబంధం కారణంగానే ఈ వేడుకకి వచ్చాను"అన్నాడు.

 ఈ సినిమాను తెలుగు ప్రేక్షకులముందుకు తీసుకువస్తోన్న వినోద్ రెడ్డి .. నా అభిమాని .. నా సినిమాలను డిస్ట్రిబ్యూట్ చేసే వ్యక్తి. 'నా పేరు సూర్య' సినిమాను పంపిణీ చేసి ఆయన నష్టపోయాడు. నష్టపోయినా ఆ విషయంపై మమ్మల్ని ఆయన ఎంతమాత్రం వత్తిడి చేయలేదు. అలాంటి మంచి మనిషికి అండగా వుండాలని అప్పుడే అనుకున్నాను. నా వలన నష్టపోయినవారికి అండగా నిలవడానికి నేను ఎంతమాత్రం సంకోచించను. అలాంటివారికి మంచి చేయడానికి నేను ఎంతవరకైనా పోతాను" అని ఆయన చెప్పాడు.