టీచర్ పోస్టులను ఫిబ్రవరిలోగా భర్తీ చేయండి.. ఏపీ, తెలంగాణకు సుప్రీంకోర్టు ఆదేశం!

తెలుగు రాష్ట్రాల్లో టీచర్ల నియామకంపై సుప్రీంకోర్టు కీలక ఆదేశాలు జారీచేసింది. ఇరు రాష్ట్రాల్లో ఈ ఏడాది ఫిబ్రవరిలోగా టీచర్ల ఖాళీలను భర్తీ చేయాలని అత్యున్నత న్యాయస్థానం ఆదేశించింది. ఉపాధ్యాయ నియామకాల్లో ఆలస్యం జరుగుతోందనీ, సుప్రీం ఆదేశాలు అమలుకావడం లేదంటూ జేకే రాజు, వెంకటేశ్‌ దాఖలు చేసిన పిటిషన్ ను విచారించిన కోర్టు ఈ మేరకు ఉత్తర్వులు జారీచేసింది.

ఈ సందర్భంగా పిటిషనర్ తరఫు న్యాయవాది వాదిస్తూ.. తెలంగాణలో నియామక ప్రక్రియ పూర్తయినప్పటికీ ఇంకా పోస్టింగులు మాత్రం ఇవ్వలేదని తెలిపారు. హైకోర్టులో ఉన్న పెండింగ్ కేసుల కారణంగా కొన్ని పోస్టులకు ఇంకా ఫలితాలను ప్రకటించలేదన్నారు. ఈ సందర్భంగా ఏపీ తరఫు న్యాయవాది స్పందిస్తూ.. తమ రాష్ట్రంలో డీఎస్సీ పరీక్షలు జరుగుతున్నాయనీ, ఫిబ్రవరి చివరికల్లా నియామక ప్రక్రియను పూర్తిచేస్తామని హామీ ఇచ్చారు. ఇరుపక్షాల వాదనలు విన్న ధర్మాసనం తదుపరి విచారణను మార్చి మొదటి వారానికి వాయిదా వేసింది.