అజిత్ 'విశ్వాసం' విడుదలపై కోలీవుడ్ టాక్

అజిత్ .. దర్శకుడు శివ అనగానే కోలీవుడ్ లో క్రేజీ కాంబినేషన్ అంటారు. ఇంతకుముందు ఈ ఇద్దరి కాంబినేషన్లో వచ్చిన మూడు సినిమాలు భారీ విజయాలను సొంతం చేసుకున్నాయి. ఇప్పుడు ఇదే కాంబినేషన్లో  'విశ్వాసం' సినిమా రూపొందుతోంది. నయనతార కథానాయికగా నటిస్తోన్న ఈ సినిమాను సంక్రాంతి కానుకగా ప్రేక్షకుల ముందుకు తీసుకు వస్తున్నట్టుగా చెప్పారు.

ఇక కార్తీక్ సుబ్బరాజు దర్శకత్వంలో రజనీకాంత్ 'పేట్ట' సినిమా చేస్తున్నాడు. రజనీ సరసన కథానాయికగా సిమ్రాన్ నటిస్తోన్న ఈ సినిమాలో త్రిష ఒక ముఖ్యమైన పాత్రలో కనిపించనుంది. ఈ సినిమాను సంక్రాంతికి విడుదల చేయనున్నట్టు ప్రకటించారు. ఈ నేపథ్యంలో ఈ పోటీ నుంచి అజిత్ సినిమా తప్పుకునే అవకాశం ఉందనే టాక్ కోలీవుడ్లో వినిపిస్తోంది. సినిమాపై వసూళ్ల ప్రభావం పడటమే కాకుండా .. థియేటర్ల సమస్య ఎదుర్కోవలసి వస్తుందనే ఉద్దేశంతో, రిలీజ్ డేట్ వాయిదా వేసుకోనున్నట్టు ప్రచారం జరుగుతోంది. ఇందులో వాస్తవమెంతన్నది చూడాలి.