కమిటీ సూచనల మేరకే సంతకాలు చేశా: పోలీసులకు రేవంత్ రెడ్డి వివరణ

హైదరాబాద్ బంజారాహిల్స్ పోలీసుల ఎదుట కాంగ్రెస్ నేత రేవంత్ రెడ్డి హజరయ్యారు. జూబ్లీహిల్స్ కోఆపరేటివ్ హౌసింగ్ సొసైటీకి చెందిన ప్లాట్ల అక్రమ విక్రయాలకు పాల్పడ్డారన్న ఆరోపణలతో రేవంత్ పై కేసు నమోదైన సంగతి తెలిసిందే. ఈ కేసుకు సంబంధించి ఆయన పోలీసుల ఎదుటకు వచ్చారు. నిన్న ఉదయం 10 గంటలకు పీఎస్ కు వచ్చిన రేవంత్... దాదాపు ముప్పావు గంట సేపు స్టేషన్ లో ఉన్నారు.

ఈ సందర్భంగా ఏసీపీ కేఎస్ రావుకు ఆయన వివరణ ఇచ్చారు. రానున్న పది రోజుల పాటు తాను హైదరాబాదులో ఉండటం లేదని... ఆ తర్వాత ఎప్పుడు విచారణకు పిలిచినా, హాజరవుతానని చెప్పారు. సొసైటీ ప్లాట్ల విక్రయాల్లో తన పాత్ర లేదని, ఆ కమిటీలో తాను కార్యవర్గ సభ్యుడిని మాత్రమేనని చెప్పారు. కమిటీ సూచనల మేరకే తాను సంతకాలు చేశానని తెలిపారు.