'మణికర్ణిక' నుంచి తప్పుకున్న సోనూసూద్

సోనూ సూద్ గురించి తెలిసినవాళ్లు ఆయన చాలా కమిట్ మెంట్ వున్న వ్యక్తి అని చెబుతారు. ఒకసారి ఒక ప్రాజెక్టు చేయడానికి అంగీకరిస్తే, తన వలన ఆ ప్రాజెక్టుకి ఎలాంటి ఇబ్బందులు ఎదురుకాకుండా చూసుకుంటూ ఉంటారు. అలాంటి సోనూ సూద్ హఠాత్తుగా 'మణికర్ణిక' సినిమా నుంచి తప్పుకోవడం ఇప్పుడు హాట్ టాపిక్ గా మారింది.

 ఓపక్క, ఇప్పటికే కంగనా రనౌత్ తో మనస్పర్థలు వచ్చిన కారణంగా దర్శకుడు క్రిష్ ఆ ప్రాజెక్టును మధ్యలోనే వదిలేశాడనే వార్తలు జోరుగా షికారు చేస్తున్నాయి. దర్శకురాలిగా కంగనా తన పేరు వేసుకుంటూ ఉండటం, ఈ వార్తకి మరింత బలాన్ని చేకూరుస్తోంది. ఈ నేపథ్యంలో సోనూ సూద్ కూడా తప్పుకున్నారని తెలుస్తోంది. ముందుగా చెప్పినట్టుగా కాకుండా తన పాత్రలో మార్పులు చేయడం పట్ల ఆయన అభ్యంతరాన్ని వ్యక్తం చేశారట. అవతల నుంచి వచ్చిన సమాధానం సంతృప్తికరంగా అనిపించకపోవడంతో, మరొకరితో ఆ పాత్రను పూర్తిచేయించుకోమని చెబుతూ, తాను తప్పుకుంటున్నట్టుగా తేల్చి చెప్పేశారట. ప్రస్తుతం ఆయన 'సింబా' షూటింగ్ పై దృష్టిపెట్టారని తెలుస్తోంది.