మాజీ ముఖ్యమంత్రి జయలలిత పాత్రలో రకుల్?

తెలుగు .. తమిళ .. హిందీ భాషల్లో ప్రస్తుతం బయోపిక్ ల జోరు కొనసాగుతోంది. ఈ మూడు భాషల్లోను ఏదో ఒక బయోపిక్ సెట్స్ పై వుంది. మరికొన్ని బయోపిక్ లు ప్రీ ప్రొడక్షన్ పనుల్లో వున్నాయి. ఈ నేపథ్యంలో హీరో సూర్య తాజా చిత్రంగా 'ఎన్ జీకే' సినిమా రూపొందుతోంది. సెల్వ రాఘవన్ దర్శకత్వం వహిస్తోన్న ఈ సినిమా చకచకా షూటింగు జరుపుకుంటోంది.

ఈ సినిమాలో సూర్య భార్య పాత్రలో సాయిపల్లవి నటిస్తుండగా .. ఒక ప్రత్యేకమైన పాత్ర కోసం రకుల్ ప్రీత్ ను తీసుకున్నారు. అయితే ఈ సినిమా 'ఎమ్ జీఆర్' జీవితచరిత్రను ఆధారంగా చేసుకుని రూపొందిస్తున్నారనే టాక్ తాజాగా కోలీవుడ్లో షికారు చేస్తోంది. రకుల్ పోషించేది తమిళనాడు మాజీ ముఖ్యమంత్రి జయలలిత పాత్రలోనేనని అనుకుంటున్నారు. విషయం ముందుగానే బయటికి వస్తే ఆటంకాలు ఏర్పడతాయనే ఉద్దేశంతోనే గుంభనంగా ఉంచారని చెప్పుకుంటున్నారు. ఇందులో వాస్తవమెంతన్నది చూడాలి. ఏదేమైనా ఒక వైపున శ్రీదేవి పాత్ర కోసం .. మరో వైపున జయలలిత పాత్ర కోసం రకుల్ పేరు వినిపిస్తూ ఉండటం విశేషం.