ఢిల్లీలో 11 మంది మృతి ఘటన.. కొన్ని గంటల ముందే వారికి రోటీలిచ్చిన ఫుడ్‌ డెలివరీ బోయ్‌

ఢిల్లీలోని బురారీ ప్రాంతంలో మూఢ నమ్మకాల వలలో చిక్కుకుని ఢిల్లీలో ఒకే కుటుంబానికి చెందిన 11 మంది మృతి చెందిన విషయం తెలిసిందే. దేశం యావత్తు నివ్వెరపోయేలా జరిగిన ఈ ఘటనలో వారి మృతి వెనుక ఏదో కుట్ర ఉందని వారి బంధువులు ఆరోపిస్తున్నప్పటికీ వారు ముక్తి కోసమే ఈ పని చేసినట్లు అనుమానాలు వ్యక్తమవుతున్నాయి.

కాగా, వారు ఈ ఘటనకు పాల్పడడానికి కొన్ని గంటల ముందు వారిని ఓ ఫుడ్‌ డెలివరీ బాయ్‌ చూశాడు. తాజాగా ఆ బాలుడు ఓ జాతీయ మీడియాతో మాట్లాడుతూ... "రాత్రి 10.30 గంటలకు వారు 20 రోటీలు ఆర్డర్‌ చేశారు. నేను రాత్రి 10.45కి ఆ రోటీలు తీసుకెళ్లి ఇచ్చాను. ఆ ఇంట్లో భాటియా కుమార్తె రోటీలను తీసుకుంది. తండ్రిని బిల్లు కట్టమని చెప్పింది. ఆ సమయంలో ఆ ఇంట్లో అంతా సాధారణ వాతావరణమే ఉంది" అని చెప్పాడు. కాగా, ఈ ఘటనపై పోలీసులు తదుపరి దర్యాప్తు కొనసాగిస్తున్నారు.