హైదరాబాద్‌లో హనుమాన్ శోభాయాత్ర.. పలు చోట్ల ట్రాఫిక్‌జామ్‌

హైద‌రాబాద్‌లో హనుమాన్ శోభాయాత్ర కొనసాగుతోంది. నగరంలోని గౌలిగూడ రామమందిరం నుంచి ప్రారంభమైన శోభాయాత్ర తాడ్‌బండ్ హనుమాన్ ఆలయం వరకు (12 కిలోమీటర్లు) జరుగుతోంది. కోఠి నుంచి కాచిగూడ, నారాయణగూడ, ఆర్టీసీ క్రాస్ రోడ్స్, గాంధీనగర్, కవాడిగూడ, ఎంజీ రోడ్ మీదుగా ఈ శోభాయాత్ర కొనసాగుతోన్న నేపథ్యంలో ఆయా ప్రాంతాల్లో ట్రాఫిక్ ఆంక్షలు విధించి వాహనాలను దారి మళ్లిస్తున్నారు. దీంతో ఆర్టీసీ క్రాస్‌రోడ్స్ సహా పలు ప్రాంతాల్లో ట్రాఫిక్ జామ్‌ ఏర్పడింది.

ఆర్టీసీ క్రాస్‌రోడ్స్ నుంచి ముషీరాబాద్ వరకు భారీగా ట్రాఫిక్‌జామ్ ఏర్పడడంతో వాహనదారులు ఇబ్బందులు ఎదుర్కుంటున్నారు. కోఠీలోని పుత్లీబౌలి నుంచి ఆంధ్రాబ్యాంక్ మీదుగా ఊరేగింపు సాగిన నేపథ్యంలో జీపీఓ నుంచి కోఠీ వైపు వచ్చే ట్రాఫిక్‌ను ఎంజే మార్కెట్ వైపుగా మళ్లించారు. కింగ్‌కోఠీ, ఓల్డ్ ఎమ్మెల్యే క్వార్టర్స్ నుంచి వైఎంసీఏ సర్కిల్ వైపు వెళ్లే వాహనాలను ఈడెన్ గార్డెన్ వైపు మళ్లించారు. అలాగే, పలుచోట్ల ట్రాఫిక్ ఆంక్షలు విధించారు.