సమయానికంటే ముందే వచ్చినా.. ప్రయాణికుడిని విమానం ఎక్కనివ్వని 'ఇండిగో'

తనను విమానం ఎక్కకుండా అడ్డుపడ్డారని దేశీయ విమాన సంస్థ ఇండిగో సిబ్బందిపై ఓ ప్రయాణికుడు ఆరోపణలు చేశాడు. ఇప్పటికే ఇండిగో ఎయిర్‌ లైన్స్ వివాదాల్లో చిక్కుకుని పలుసార్లు వార్తల్లోకెక్కిన విషయం తెలిసిందే. తాజాగా, అదే సంస్థపై ఇటువంటి ఆరోపణలు రావడం గమనార్హం. ఇండిగో సిబ్బంది తీరును వివరిస్తూ సదరు ప్రయాణికుడు ఓ వీడియో కూడా విడుదల చేశాడు.

తాను హైదరాబాద్‌ నుంచి గోవా వెళ్లడానికి 6ఈ-743 విమానం ఎక్కడానికి, రావాల్సిన సమయం కంటే ముందుగానే వచ్చానని ఆ వీడియోలో తెలిపాడు. అయినప్పటికీ విమాన సిబ్బంది ఆలస్యంగా వచ్చానని తనను విమానం ఎక్కనివ్వలేదని అన్నాడు. అతడితో పాటు ఓ మహిళ, పిల్లాడు కూడా ఉన్నారు. వారిని కూడా విమానం ఎక్కడానికి అంగీకరించలేదని తెలిసింది. విమానం వద్దకు వెళ్లడానికి ఎయిర్‌పోర్టులో కేటాయించిన బస్సుని కూడా తాము ఎక్కామని, ఒకవేళ తాము ఆలస్యంగా వస్తే బస్సు ఎందుకు ఎక్కనిస్తారని ఆయన అడిగాడు.