బ్యాంకులను 11 వేల కోట్లకు ముంచిన నీరవ్ మోదీ ఇప్పుడెక్కడున్నాడో కనిపెట్టేశారు!

ఇండియాలోని రెండో అతిపెద్ద ప్రభుత్వ రంగ బ్యాంకు పంజాబ్ నేషనల్ బ్యాంకు సహా, మరెన్నో బ్యాంకులను రూ. 11 వేల కోట్లకు పైగా మోసం చేసి విదేశాలకు చెక్కేసిన సెలబ్రిటీ జ్యూయెలర్ నీరవ్ మోదీ ఇప్పుడు ఎక్కడున్నాడో కనిపెట్టేశారు. ఆయన ప్రస్తుతం న్యూయార్క్, మన్ హట్టన్ లోని జేడబ్ల్యూ మారియట్ ఎస్సెక్స్ హౌస్ లో ఉన్న ఓ సూట్ లో తన ఫ్యామిలీతో కలసి ఉంటున్నారు.

 అతను ఉంటున్న లగ్జరీ సూట్ కు నడిచి వెళ్లేంత దూరంలోనే ఆయన ఆధ్వర్యంలో నడుస్తున్న లూక్స్ మాడిసన్ అవెన్యూ జ్యూయెలరీ రిటైల్ స్టోర్ ఉండటం గమనార్హం. కాగా, భారత ప్రభుత్వం శుక్రవారం నాడు నీరవ్ మోదీ పాస్ పోర్టును సీజ్ చేయాలని నిర్ణయించిన సంగతి తెలిసిందే. పంజాబ్ నేషనల్ బ్యాంకును మోసం చేసిన కేసులో నీరవ్ తో పాటు ఆయన భార్య, కుటుంబీకులు, వ్యాపార భాగస్వామి మెహుల్ చోక్సీలు నిందితులుగా ఉండగా, వారెవరూ ఇప్పుడు ఇండియాలో లేకపోవడం గమనార్హం. జనవరి 1న ఇండియాను వదిలిపోయిన ఆయన, చివరిగా జనవరి 23న దావోస్ లో జరిగిన  వ్యాపారవేత్తల సదస్సులో పాల్గొని ప్రధాని నరేంద్ర మోదీతో కలసి ఓ ఫోటో దిగారు.నీరవ్ కుటుంబం తలదాచుకున్న ఎస్సెక్స్ హౌస్ (ఫోటో మారియట్ డాట్ కామ్ నుంచి)