నా స్నేహితులు, శ్రేయోభిలాషులు, అభిమానులకు ఓ విజ్ఞప్తి: ముద్రగడ పద్మనాభం

కాపు, బలిజ, తెలగ, ఒంటరి కులాలకు బీసీ రిజర్వేషన్ ఫలాలు అందే వరకూ ఏ పండగ చేసుకోననే విషయాన్ని మరోమారు గుర్తు చేస్తున్నానని కాపు ఉద్యమ నేత ముద్రగడ పద్మనాభం అన్నారు. ఈ మేరకు ఆయన ఓ ప్రకటన విడుదల చేశారు. 2018 కొత్త సంవత్సర వేడుకలకూ దూరంగానే ఉంటానని, మన సామాజిక వర్గాలు ఆశించిన మేరకు రిజర్వేషన్లు పొందడమే అసలైన పండగగా భావిస్తున్నానని పేర్కొన్నారు.

ఆ అసలైన పండగ కోసం..ఆరోజు కోసమే తాను కూడా నిరీక్షిస్తున్నానని తెలిపారు. జనవరి 1న తనను కలిసేందుకు, శుభాకాంక్షలు చెప్పేందుకు కిర్లంపూడికి వచ్చే ప్రయత్నం చేయవద్దని తన అభిమానులకు, శ్రేయోభిలాషులకు, స్నేహితులకు విజ్ఞప్తి చేస్తున్నానని తన ప్రకటనలో ముద్రగడ పేర్కొన్నారు.