'గంగోత్రి'లో అవకాశం ఇచ్చి, చొక్కా, నిక్కర్ కొలతలు అడిగారు... సింపుల్ గా వద్దనేసి వచ్చేశా: హిట్ చిత్రాల దర్శకుడు బాబీ

చిన్నికృష్ణ కథ రాయగా, కే రాఘవేంద్రరావు దర్శకత్వంలో అల్లు అర్జున్ తొలి చిత్రంగా తెరకెక్కిన 'గంగోత్రి'లో ఓ పాత్రకు తనకు అవకాశం ఇస్తే, వద్దని చెప్పి వచ్చేశానని గుర్తు చేసుకున్న 'జై లవకుశ' దర్శకుడు బాబీ, అందుకు కారణాన్ని ఓ ఇంటర్వ్యూలో చెప్పాడు. తాను సినిమా అవకాశాల కోసం వచ్చిన వేళ, బంజారాహిల్స్ లోని చిన్నికృష్ణ ఇంటి ముందు రోజూ నిలబడి చూస్తుంటే, పన్నెండు రోజులకు పిలుపు వచ్చిందని చెప్పాడు.

తనకు సినిమా పిచ్చి ఉందని తెలుసుకుని, రాఘవేంద్రరావును కలవాలని పంపించాడని, అప్పుడే 'గంగోత్రి' సినిమా తయారవుతుండగా, అల్లు అర్జున్ ఫ్రెండ్స్ గా ఎనిమిది మంది కావాలని చెప్పి, తనకు, తన ఫ్రెండ్ కిషోర్ కు వేషం ఇస్తూ, "బయట కాస్ట్యూమ్ డిజైన్ ఉంటాడు. వెళ్లి చొక్కా, నిక్కర్ కొలతలు ఇచ్చి వెళ్లండి" అని రాఘవేంద్రరావు చెప్పారని అన్నాడు. మూడో తరగతి నుంచే నిక్కర్లు వదిలేసి ప్యాంట్లకు మారిన తనకు నిక్కర్ వేసుకోవడం ఇష్టం లేక, ఆ పాత్రను వద్దని చెప్పి వచ్చేశానని, తన వైఖరితో చిన్నికృష్ణకు కూడా కోపం వచ్చిందని చెప్పాడు. ఆ ఘటనతో తన కష్టాలు మొదటికి వచ్చాయని చెప్పుకొచ్చాడు.