‘తాజ్ మహల్’ చుట్టూ ఉన్న పార్కింగ్ ప్రాంతాన్ని తొలగించాలి: ‘సుప్రీం’ ఆదేశాలు

ఆగ్రాలోని చారిత్రక కట్టడం తాజ్ మహల్ చుట్టూ ఉన్న పార్కింగ్ ప్రాంతాన్ని వెంటనే తొలగించాలని సుప్రీంకోర్టు ఆదేశాలు జారీ చేసింది. పార్కింగ్ కారణంగా పర్యావరణ కాలుష్యం ఏర్పడే ప్రమాదం ఉండటంతో తాజ్ మహల్ ను సంరక్షించే నిమిత్తం ఈ ఆదేశాలు జారీ చేసినట్టు సుప్రీంకోర్టు పేర్కొంది.

 కాగా, గత ఆగస్టులోనూ తాజ్ మహల్ విషయమై యూపీ సర్కార్ ని సుప్రీంకోర్టు మందలించింది. ప్రపంచ ప్రసిద్ధి చెందిన కట్టడాన్ని నాశనం చేయాలని అనుకుంటున్నారా? అంటూ ప్రశ్నించింది. మధుర - ఢిల్లీ మధ్య అదనపు రైల్వే ట్రాక్ నిర్మాణం కోసం సుమారు నాలుగు వందల చెట్లను నరికి వేసేందుకు అనుమతి నిమిత్తం యూపీ ప్రభుత్వం ఇటీవల దరఖాస్తు చేసుకుంది. ఈ దరఖాస్తును విచారిస్తున్న సమయంలోనూ యూపీ సర్కార్ పై సుప్రీంకోర్టు ఆగ్రహం వ్యక్తం చేసింది.